Opozita Braktis Sallën e Kuvendit, Mbledhje Urgjente për Shkak të Refuzimit për Komisione Hetimore
Deputetët e opozitës kanë braktisur punimet e Kuvendit, pasi kërkesa e tyre për ngritjen e dy komisioneve hetimore nuk u pranua nga mazhoranca. Njëri komision do të hetonte çështjen “McGonigal”, ndërsa tjetri do të shqyrtonte zgjedhjet e 11 majit.
Kreu i Grupit Parlamentar të Partisë Socialiste, Taulant Balla, deklaroi se kërkesa e opozitës ishte e paplotë dhe i ftoi ata të marrin pjesë në komisionin e Reformës Zgjedhore. Sipas Ballës, zgjedhjet e 11 majit janë certifikuar nga institucionet ndërkombëtare.
Në përgjigje, kreu i Partisë Demokratike, Sali Berisha, theksoi se zgjedhjet e 11 majit janë cilësuar si “farsë elektorale” në raportin e OSBE-ODIHR dhe se opozitës po i mohohet e drejta kushtetuese për ngritjen e komisionit hetimor.
Berisha e cilësoi këtë situatë si “një nga aktet më të rëndë në historinë e vendit” dhe u zotua për luftën për rikthimin e votës së lirë. Ai shtoi se opozita nuk i ka njohur këto zgjedhje dhe rezultatin e tyre, duke akuzuar mazhorancën për përdorimin e mekanizmave diktatorialë për të deformuar rezultatin.
“Ky është një akt ndër më të rëndët në historinë e vendit. Ju garantoj se ne do bëjmë çdo betejë për të rikthyer votën e lirë. Dhe se për këtë betejë ju vetëm sa firmosni fundin e këtij parlamenti. Ne nuk kemi njohur zgjedhjet dhe rezultatin e tyre,” – tha Berisha.
“Shkelët parimet më themelore të zgjedhjeve të drejta. Që përdorët të gjithë mekanizmat e një diktature autokratike për të deformuar rezultatin dhe tani keni frikë nga mijëra e mijëra fakte që ne disponojmë për t’iu paraqitur shqiptarëve se si ishte fara. Dhe ju besoni se duke na bllokuar ne të drejtën kushtetuese do të mund të kapërceni këtë. Kurrë jo! Ne do ju përgjigjemi,” – tha Berisha.
Partia Demokratike pritet të mbledhë të premten Grupin Parlamentar për të vendosur hapat që do të ndjekë pas këtij refuzimi nga Partia Socialiste. Një njoftim dërguar deputetëve të PD-së thuhet:
“Nesër, e premte datë 31 Tetor, ora 12:00, mbledhje e posaçme e Grupit Parlamentar të PD lidhur me situatën e krijuar sot në Kuvend me mohimin e të drejtave kushtetuese të opozitës. Lutem të mos ketë asnjë mungesë për shkak të rëndësisë së mbledhjes.”