Sekretari i Thesarit i SHBA-së: Kina bëri “gabim” duke vendosur kufizime në eksportet e metaleve të rralla
Sekretari i Thesarit i Shteteve të Bashkuara, Scott Besant, deklaroi se Kina bëri një “gabim” duke vendosur kufizime në eksportet e metaleve të rralla, duke shtuar se Pekini ka nxjerrë në pah një nga armët e saj tregtare.
“Kina paralajmëroi botën për rrezikun. Ata me të vërtetë bënë një gabim”, u shpreh Besant në një intervistë për Financial Times të publikuar sot. “Është një gjë të vendosësh një armë në tavolinë, është një tjetër të qëllosh në ajër”, vijoi ai.
Në fillim të tetorit, Pekini njoftoi kontrolle mbi eksportet e teknologjive që lidhen me metalet e rralla, minerale këto thelbësore për industrinë e automobilave, elektronikën dhe mbrojtjen.
Pas bisedimeve midis Presidentit Kinez Xi Jinping dhe homologut të tij amerikan Donald Trump në Korenë e Jugut të enjten, Pekini ra dakord të pezullojë disa nga këto kufizime për të paktën një vit.
Çështja e metaleve të rralla përbën një pikë kyçe fërkimi mes dy ekonomive më të mëdha në botë dhe një burim të konsiderueshëm përçarjeje në zinxhirët globalë të furnizimit. Kina ka pothuajse monopol në përpunimin e këtyre metaleve dhe është kritikuar për përdorimin e pozicionit të saj për të ushtruar presion mbi partnerët tregtarë.
Por, sipas Besant, Pekini ka humbur avantazhin e tij. “Ne kemi masa në vend për të kompensuar situatën”, theksoi zyrtari amerikan. “Mendoj se udhëheqja kineze ishte pak e shqetësuar nga reagimi i publikut ndaj kufizimeve”, shtoi ai.