Holanda dhe Spanja kërkojnë moshë minimale edhe për inteligjencën artificiale dhe lojërat online në BE
Holanda dhe Spanja po avancojnë propozimin për vendosjen e një moshe minimale për përdorimin e mediave sociale në të gjithë Bashkimin Evropian, me mundësinë e shtrirjes së kësaj mase edhe për shërbime të tjera online. Komisioni Evropian pritet të shpallë propozimin e tij javën e ardhshme.
Të dy vendet argumentojnë se ndalimi i mediave sociale duhet të harmonizohet dhe të zbatohet në nivel evropian, duke u shtrirë edhe në videolojëra, biseda me inteligjencë artificiale (chatbotë) dhe shërbime të tjera dixhitale që konsiderohen të rrezikshme. Kjo kërkesë është bërë e ditur në një dokument jo-ligjor të qarkulluar të premten.
Kufizimi i aksesit të të miturve në mediat sociale është kthyer në një temë kyçe debati në BE dhe më gjerë. Vende të shumta si Franca, Greqia, Austria, Danimarka, Spanja, Belgjika, Italia, Gjermania, Polonia dhe Holanda po shqyrtojnë ose kanë përparuar me legjislacion kombëtar në këtë drejtim.
Për t’i shmangur qasjet e fragmentuara kombëtare, Presidentja e Komisionit Evropian, Ursula von der Leyen, ka njoftuar në maj se një propozim nga BE-ja është në pritje dhe pritet të bëhet publik gjatë fjalimit të saj për Gjendjen e Unionit javën e ardhshme.
Para këtij njoftimi, qeveritë holandeze dhe spanjolle kanë shpërndarë një dokument që synon të ndikojë në propozimin e ardhshëm. Ato theksojnë se vendosja e një moshe minimale për mediat sociale është “një masë që domosdoshmërisht duhet t’i shtohet kornizave ligjore ekzistuese dhe atyre të ardhshme”.
Dy vendet argumentojnë se masa duhet të jetë proporcionale dhe të respektojë të drejtat themelore, përfshirë lirinë e shprehjes, të drejtën për informacion dhe mbrojtjen e të dhënave, duke u bazuar në një vlerësim gjithëpërfshirës të ndikimit.
Në gusht, Këshilli Kushtetues Francez hodhi poshtë një ligj kombëtar që ndalonte aksesin në mediat sociale për personat nën 15 vjeç, duke e konsideruar masën shumë të gjerë dhe jo mjaftueshëm proporcionale, pasi cenonte të drejtat kushtetuese.
Dokumenti i Holandës dhe Spanjës propozon që algoritmet krijues të varësisë dhe dizajni i dëmshëm në të gjitha shërbimet dixhitale të trajtohen përmes një qasjeje të bazuar në risk, duke zgjeruar fushëveprimin përtej mediave sociale, përfshirë videolojërat dhe shoqëruesit me inteligjencë artificiale.
Dokumenti shton se “duhet të ketë një mundësi që ofruesit e shërbimeve online të marrin një përjashtim nga kërkesa e moshës nëse mund të demonstrojnë se shërbimi i tyre është mjaftueshëm i sigurt”.
Për të dy vendet, zbatimi i harmonizuar në nivel BE-je është jetik, pasi fragmentimi kombëtar do të dobësonte efektivitetin e masës. Ato referojnë Aktin e Shërbimeve Dixhitale, sipas të cilit Komisioni tashmë vepron si rregullator për shërbime online si Google, Instagram dhe TikTok, si model për t’u ndjekur.
Dokumenti sugjeron gjithashtu që propozimi i ardhshëm të jetë i kujdesshëm në mbështetjen te pëlqimi prindëror si masë lehtësuese, pasi ky mekanizëm do të ishte vështirë të zbatohej dhe do të sillte rreziqe shtesë për privatësinë.
Për të garantuar funksionalitetin e ndalimit, një aplikacion për verifikimin e moshës është konsideruar thelbësor. Spanja dhe Holanda dëshirojnë që propozimi legjislativ i ardhshëm të mbështetet në kuadrin e verifikimit të moshës të BE-së, ku funksioni i aplikacionit do të kufizohet në konfirmimin se personi është mbi një moshë të caktuar, në mënyrë që të minimizohet ndikimi në privatësi.