Përmbytjet në Indonezi: 13 fëmijë humbin jetën pas rrëshqitjes së dheut në Papuan
Të paktën 15 persona, përfshirë fëmijë, janë zhdukur dhe dyshohet se kanë humbur jetën pas një rrëshqitjeje masive dheu të shkaktuar nga reshjet e dendura në provincën Papuan, në lindje të Indonezisë. Këtë e ka njoftuar një zyrtar lokal.
Sipas Alfredo Agustinus Rubiak, shef i policisë së rajonit Duga, 13 nga viktimat ishin fëmijë të moshës 8 deri në 17 vjeç. Ai shpjegoi se fëmijët po ktheheshin në shtëpi pas një loje volejbolli kur tentuan të kalonin një lumë, përballë shpërthimit të papritur të përmbytjeve.
Fillimisht, ata u strehuan mbi disa shkëmbinj të mëdhenj, por rrjedha e fuqishme e ujit i mori me vete. Disa nga fëmijët u bllokuan nën rrëshqitjen e shkëmbinjve, të shkaktuar nga reshjet, shtoi Rubiak.
Aktualisht, banorët, policia, ushtria dhe shërbimet emergjente lokale po vazhdojnë kërkimet për viktimat, megjithëse terreni i ashpër dhe shkëmbor e vështirëson ndjeshëm operacionin.
Zyrtari theksoi se autoritetet kanë nevojë për helikopterë për të arritur në zonën e prekur, pasi përndryshe, do të duhej të ecin për tetë orë nga qyteti më i afërt.
Operacioni i shpëtimit komplikohet më tej nga fakti se zona konsiderohet “zonë e kuqe” për arsye sigurie, nënvizoi Rubiak.