Gjermania është zotuar të vazhdojë me përpjekjet për kthimin e refugjatëve sirianë në atdheun e tyre, megjithëse ka pasiguri rreth mundësisë së një kthimi të shpejtë.
Zëdhënësi i qeverisë, Stefan Kornelius, në një konferencë për shtyp në Berlin, theksoi se fokusi aktual është mbi stabilizimin e situatës në Siri dhe lehtësimin e riatdhesimit vullnetar të refugjatëve. Ai shtoi se ky proces varet nga plotësimi i kushteve të shumta ligjore dhe se qeveria gjermane po punon për këtë drejtim.
“Qeveria federale ka padyshim interes për stabilizimin e Sirisë dhe për rindërtimin e vendit nga vetë sirianët, duke inkurajuar kthimin e tyre. Megjithatë, për të ndodhur kjo, duhet të krijohen kushtet e nevojshme ligjore dhe materiale,” tha Kornelius.
Komentet vijnë në një kohë kur Ministri i Jashtëm Johann Wadephul është kritikuar brenda partisë së tij Demokristiane për deklaratat se kthimi i sirianëve aktualisht është “i mundur vetëm në një masë shumë të kufizuar, pasi një pjesë e madhe e infrastrukturës në vend është shkatërruar plotësisht”. Wadephul i bëri këto komente gjatë një vizite në periferi të Damaskut, ku u shokua nga niveli i shkatërrimit pas luftës civile.
Ndërkohë, kancelari Friedrich Merz, duke përsëritur mbështetjen për ministrin e kritikuar, njoftoi planet për të ftuar Presidentin Ahmad al-Sharaa në Berlin për bisedime mbi tranzicionin politik të Sirisë, rimëkëmbjen ekonomike dhe riatdhesimin e refugjatëve.
“Lufta civile në Siri ka përfunduar dhe vendi tani ka nevojë për të gjitha burimet e tij, mbi të gjitha për popullin sirian, për të rindërtuar vendin,” deklaroi Merz, duke shtuar se pritet që refugjatët të fillojnë të kthehen në vendin e tyre.