Trump nis një tur 32-ditor, Presidenti amerikan hyn në garën për zgjedhjet e Kongresit
Presidenti amerikan Donald Trump ka paralajmëruar një angazhim të drejtpërdrejtë në fushatën për zgjedhjet e mesit të mandatit, duke planifikuar një tur 32-ditor në të gjithë vendin deri më 3 nëntor, kur amerikanët do të votojnë për përbërjen e re të Kongresit.
Zgjedhjet do të përcaktojnë përbërjen e Dhomës së Përfaqësuesve dhe Senatit për dy vitet e ardhshme të mandatit të Trump. Presidenti amerikan u shpreh i bindur për pozitat e republikanëve dhe hodhi poshtë shqetësimet se disa kandidatë të partisë së tij po përpiqen të distancohen prej tij.
Trump tha se gjatë javëve të ardhshme do të udhëtojë në disa shtete për të mbështetur kandidatët republikanë. Ndër ndalesat e para që ai përmendi janë Teksasi dhe Ohajo.
“Turneu 32-ditor” do ta vendosë presidentin në qendër të përpjekjeve elektorale të republikanëve, në një periudhë kur sondazhet e fundit kanë treguar avantazh të demokratëve në preferencat kombëtare për zgjedhjet e Kongresit. Një sondazh i Reuters/Ipsos i publikuar më 21 shtator tregonte se 43% e votuesve të regjistruar anonin nga kandidatët demokratë, kundrejt 35% për republikanët.
Kostoja e jetesës, çmimet e karburanteve dhe lufta me Iranin janë ndër çështjet që po dominojnë debatin elektoral. Në një tjetër zhvillim, një sondazh i Reuters/Ipsos i shtatorit e kishte vlerësuar miratimin e Trump në 32%, niveli më i ulët i regjistruar në atë seri sondazhesh për presidencën e tij.
Trump, megjithatë, ka deklaruar se kandidatët republikanë kërkojnë praninë e tij në fushatë dhe se ai është i gatshëm të udhëtojë në mbështetje të tyre. Ndërkohë, qëndrimi i kandidatëve republikanë ndaj përfshirjes së presidentit në fushatë nuk është i njëjtë. Disa prej tyre e kanë mirëpritur mbështetjen e Trump, ndërsa të tjerë kanë zgjedhur të përqendrohen më shumë te çështjet lokale dhe te bilanci i tyre politik.
Zgjedhjet e 3 nëntorit do të përcaktojnë kontrollin e dy dhomave të Kongresit dhe rrjedhimisht edhe hapësirën politike për administratën Trump gjatë dy viteve të fundit të mandatit.