Vlora Zgjedh Kryebashkiakun e Ri në Mes Përmbytjesh
Reshjet e dendura të shiut që kanë përfshirë qytetin e Vlorës gjatë ditës së sotme kanë shkaktuar përmbytje në disa akse rrugore dhe zona të banuara. Kjo situatë ka krijuar kaos në qarkullim dhe vështirësi serioze për qytetarët.
Përveç rrugëve kryesore të qytetit, uji ka depërtuar edhe në disa qendra votimi. Qytetarët janë detyruar të kalojnë mes pellgjeve për të ushtruar të drejtën e votës.
Situata e motit të keq ka ndikuar ndjeshëm në pjesëmarrjen e ulët të votuesve në këto zgjedhje të pjesshme për Bashkinë e Vlorës. Pamjet nga terreni tregojnë rrugë të përmbytura dhe qendra votimi ku uji ka hyrë brenda ambienteve.
Sipas raportimeve, autoritetet lokale nuk kanë marrë masa për menaxhimin e situatës. Vlora shënon pjesëmarrjen më të ulët në 5 bashkitë ku po zhvillohen zgjedhje këtë të diel.