Diskutime për ndalimin e kontrabandës së fentanilit, Reuters: Drejtori i FBI-së kreu vizitë sekrete në Kinë
Drejtori i FBI-së, Kash Patel, zhvilloi një vizitë të paplanifikuar në Kinë javën e kaluar për të diskutuar “çështjet lidhur me fentanilin dhe zbatimin e ligjit”, raportoi Reuters të hënën, duke cituar dy burime të njohura me këtë çështje.
Sipas raportimeve, Patel mbërriti në Pekin të premten dhe qëndroi për rreth një ditë, duke zhvilluar bisedime me zyrtarë kinezë të shtunën. Asnjëra palë nuk i ka konfirmuar zyrtarisht këto bisedime.
Ky raport vjen pas takimit të Presidentit të SHBA-së, Donald Trump, me udhëheqësin kinez Xi Jinping gjatë një samiti rajonal në Korenë e Jugut muajin e kaluar. Pas takimit, Trump hoqi tarifat për importet nga Kina, të cilat administrata e tij i kishte lidhur me çështjen e fentanilit. Të dy fuqitë janë të përfshira në një “luftë tregtare”, siç e ka quajtur Presidenti Trump.
Zyrtarët amerikanë kanë akuzuar Pekinin se ka lejuar rrjedhën e fentanilit dhe kimikateve pararendëse të përdorura për prodhimin e këtij opioidi sintetik, i cili dyshohet se është shkaktar i dhjetëra mijëra vdekjeve nga mbidoza çdo vit në Amerikë. Kina i ka cilësuar akuzat si të motivuara politikisht, duke theksuar përpjekjet e saj të brendshme kundër prodhuesve të paligjshëm të kimikateve.
Sipas Administratës Amerikane për Zbatimin e Ligjit kundër Drogës (DEA), shumica e fentanilit që depërton në SHBA vjen nga Meksika, ku kartetet e sintetizojnë atë duke përdorur pararendës të importuar. Statistikave të sekuestrimit të drogës tregojnë se shumica e fentanilit hyn në vend përmes pikave zyrtare të hyrjes në kufirin jugor, dhe jo përmes rrugëve klandestine.
Administrata Trump ka përdorur gjithashtu akuzat për narkoterrorizëm për të justifikuar sulmet ajrore ndaj anijeve civile, të cilat presidenti pretendonte se ishin të përfshira në kontrabandën e fentanilit nga Venezuela.
Për t’u bërë pjesë e grupit “Balkanweb”, mjafton të klikoni dhe kërkesa do të aprovohet menjëherë.