Kina dhe Spanja nënshkruajnë marrëveshje për forcimin e bashkëpunimit
Mbreti spanjoll Felipe VI dhe Presidenti kinez Xi Jinping nënshkruan të mërkurën një marrëveshje për shkëmbimet gjuhësore dhe fusha të tjera, duke u zotuar për të forcuar bashkëpunimin mes dy vendeve.
Vizita e monarkut vjen në një kohë kur Spanja, ekonomia e katërt më e madhe e eurozonës, vazhdon të jetë joshëse për investimet kineze, ndërkohë që marrëdhëniet me Shtetet e Bashkuara janë të tendosura nën presidencën e Donald Trump.
Në prill, kryeministri spanjoll Pedro Sánchez kreu vizitën e tij të tretë në Kinë në po aq vite. Spanja është konsideruar si një nga vendet më miqësore me Kinën në krahasim me vendet e tjera në Bashkimin Evropian gjatë viteve të fundit.
Felipe dhe Mbretëresha Letizia u pritën nga Xi dhe bashkëshortja e tij Peng Liyuan para Sallës së Madhe të Popullit në Pekin, ku u zhvillua një ceremoni me pjesëmarrjen e bandës ushtarake dhe një përshëndetje me 21 topa.
Kjo është vizita e parë shtetërore e mbretit spanjoll në Kinë. Ai u shoqërua nga Ministri i Jashtëm spanjoll José Manuel Albares.
“Kina është e gatshme të punojë krah për krah me Spanjën për të ndërtuar një partneritet strategjik gjithëpërfshirës, i cili të jetë më i qëndrueshëm strategjikisht, më dinamik në zhvillim dhe më me ndikim ndërkombëtar”, tha Xi në fjalën e tij hapëse, duke theksuar veçanërisht situatën ndërkombëtare, e cila është “komplekse dhe e paqëndrueshme”.
Ai shtoi se Kina do të importojë më shumë produkte spanjolle, pa specifikuar detaje, sipas një njoftimi të takimit nga agjencia zyrtare e lajmeve Xinhua.
Felipe dhe Xi nënshkruan marrëveshje që nxisin bashkëpunimin në fushën e shkëmbimeve gjuhësore, çështjet ekonomike dhe eksportimin e produkteve ujore në Kinë.
Mbreti Filipi pritet të takohet gjithashtu me kryeministrin kinez Li Qiang dhe Zhao Leji, kryetarin e organit më të lartë legjislativ të Kinës.