Maduro i dërgon mesazh Trumpit: Duam paqe, jo një Libi apo Afganistan tjetër
Presidenti i Venezuelës, Nicolas Maduro, i ka bërë thirrje Shteteve të Bashkuara që të bashkohen me Venezuelën për të promovuar paqen në Amerikë, duke kritikuar dislokimin e anijeve luftarake në Karaibe për të luftuar trafikun e drogës.
Duke folur për CNN gjatë një tubimi në Karakas të enjten, Maduro theksoi se Shtetet e Bashkuara dhe Venezuela duhet të bashkëpunojnë për paqen në rajon, veçanërisht në kontekstin e tensioneve të larta.
Maduro u bëri thirrje amerikanëve të shmangin një konflikt tjetër të zgjatur, duke u drejtuar popullit amerikan në spanjisht: “Le të bashkohemi për paqen e Amerikës. Mjaft me luftëra të pafundme. Mjaft me luftëra të padrejta. Mjaft me Libi. Mjaft me Afganistan”.
Kur u pyet nëse kishte një mesazh për Presidentin amerikan Donald Trump, Maduro u përgjigj në anglisht: “Po paqe, po paqe”.
Maduro nuk komentoi nëse ishte i shqetësuar për një ndërhyrje të mundshme ushtarake nga SHBA-ja. Në vend të kësaj, ai tha se fokusi i tij ishte në qeverisjen paqësore të vendit të tij.
Presidenti venezuelian mori pjesë në një tubim masiv për të rinjtë venezuelianë, të cilët i nxiti të rezistonin ndaj asaj që ai e quajti “kërcënimi i pushtimit nga SHBA-ja”.
Gjatë tre muajve të fundit, SHBA-të kanë dislokuar rreth 15,000 trupa në Karaibe, të mbështetur nga më shumë se një duzinë anije luftarake, përfshirë një aeroplanmbajtëse, e cila përshkruhet si “platforma më vdekjeprurëse luftarake” e Marinës Amerikane. Ky dislokim ushtarak, që konsiderohet si prania më e madhe ushtarake amerikane në rajon që nga pushtimi i Panamasë në vitin 1989, ka nxitur spekulime se SHBA-të mund të jenë duke u përgatitur për një konflikt më të gjerë.
SHBA-të thonë se kanë kryer të paktën 20 sulme ndaj anijeve të dyshuara për trafik droge në Karaibe dhe Paqësor, duke rezultuar në 80 viktima.