Përleshje gjatë demonstratave kundër krimit në Meksikë, 120 protestues të plagosur
Gjatë një proteste masive të së shtunës në kryeqytetin e Meksikës kundër mënyrës si presidentja po trajton krimin e dhunshëm, më shumë se 100 persona u plagosën dhe 20 u arrestuan, sipas zyrtarëve lokalë të qeverisë.
Mijëra persona marshuan drejt sheshit historik kryesor të Mexico City, Zocalo, në një demonstratë të nxitur nga të rinjtë e lidhur me një valë globale protestash të “Gjeneratës Z”, si edhe nga mbështetësit e “Lëvizjes Sombrero” vendase. Kjo e fundit u shfaq pas vrasjes së kohëve të fundit të një kryetari bashkie të njohur për luftën kundër krimit të organizuar.
Gazetarët e AFP-së vëzhguan pjesëmarrës të të gjitha moshave që merrnin pjesë në tubim para Pallatit Kombëtar, ku jeton dhe punon presidentja Claudia Sheinbaum. Disa protestues, shumë prej të cilëve mbanin maska, rrëzuan barrierat metalike që rrethonin pallatin dhe hodhën gurë kalldrëmi drejt policisë së trazirave, të cilët u përgjigjën me gaz lotsjellës.
“Ky mobilizim vazhdoi dhe u zhvillua paqësisht për shumë orë, derisa një grup personash të maskuar filloi të kryente akte dhune,” tha shefi i sigurisë së Mexico City, Pablo Vazquez, për gazetarët. Ai shtoi se njëzet protestues dhe 100 policë u plagosën, ndërsa 40 zyrtarë policorë u shtruan në spital me prerje dhe mavijosje.
Vazquez tha se policia arrestoi 20 persona për vjedhje dhe sulm, dhe kishte hapur gjithashtu një hetim për sulmin ndaj një gazetari të gazetës La Jornada, e cila pretendonte se zyrtarë policorë ishin përfshirë në incident.
Sheinbaum, e cila mori detyrën në tetor 2024, ka pasur vlerësime të larta nga qytetarët e Meksikës gjatë vitit të saj të parë, por është përballur me kritika gjithnjë e më të mëdha ndaj politikave të saj të sigurisë pas disa vrasjeve me profil të lartë.
“Kjo është një nga qeveritë më të korruptuara që kemi pasur ndonjëherë,” tha Valentina Ramirez, një studente e intervistuar nga AFP. “Është një narko-qeveri e korruptuar që dëshiron të mbrojë të korruptuarit dhe kartelët në vend të njerëzve.”
Të shtunën, disa protestues mbanin sombrero të ngjashëm me stilin e kapelës së bërë të famshme nga Carlos Manzo, një kryetar bashkie në shtetin perëndimor Michoacan, i cili u vra më 1 nëntor. Ai ishte i njohur për fushatën e tij kundër bandave të trafikut të drogës në qytetin e tij të lindjes, Uruapan. Megjithatë, e veja e kryetarit të vrarë të bashkisë u distancua nga demonstrata e së shtunës, duke theksuar se lëvizja e bashkëshortit të saj nuk ishte e lidhur me të. Bernardo Bravo, një drejtues i prodhuesve të limës në të njëjtën zonë, ishte gjithashtu vrarë në fund të tetorit.
Më herët gjatë javës, Sheinbaum vuri në pikëpyetje motivimet e demonstratës, duke deklaruar në konferencën e saj të rregullt të mëngjesit se protesta ishte “inorganike” dhe “e paguar”. “Është një lëvizje e promovuar nga jashtë kundër qeverisë,” tha ajo.
Protestuesit mbanin pankarta me mesazhe si “Ne jemi të gjithë Carlos Manzo”, krahas flamurit ikonik pirat nga manga japoneze One Piece, i cili është bërë simbol i protestës së të rinjve anembanë botës, nga Madagaskari te Filipinet dhe Peruja. Disa protestues bërtisnin drejt forcave të sigurisë: “Duhej ta kishit mbrojtur Carlos Manzon kështu!”, ndërsa forcat e sigurisë u përgjigjën me gaz lotsjellës dhe armë zjarri.
Për t’u bërë pjesë e grupit “Balkanweb” mjafton të klikoni dhe kërkesa do t’ju aprovohet menjëherë.