Përmbyten katet e para të banesave në Pogradec, familjet në Vërdovë pa ndihmë
Reshjet intensive në Pogradec kanë shkaktuar probleme në disa pallate, ku katet e para janë mbuluar nga uji si pasojë e motit të keq. Gjithashtu, tre familjeve të dëmtuara në fshatin Vërdovë nuk po u ofrohet ndihmë pasi mjetet e rënda nuk kanë akses.
Në hyrje të qytetit të Pogradecit është konstatuar një masiv shkëmbor me rrezik potencial. Bashkia Pogradec ka njoftuar për punën intensive në terren, duke përfshirë hartimin e procesverbaleve për familjet e prekura dhe evidentimin e rasteve të reja.
Problematika të tjera janë raportuar në Lumin e Verdovës dhe Rremenjit, ku po punohet me mini-fadromë të firmës private “REI shpk” në bashkëpunim me njësitë administrative për të ofruar ndihmë familjeve. Sipas njoftimeve, akset rrugore në territor janë të kalueshme.
Në qytet, probleme me ujë në katet e para të pallateve janë evidentuar në zonën “1 Maji”. Është depozituar kërkesë pranë SHGjSH për ekspertizë lidhur me rezervuarin Grunjas.
Për masivin shkëmbor në hyrje të qytetit, janë marrë masa për sigurinë e zonës. Subjekti “2T” vijon punën intensive për pastrimin e masivit shkëmbor nga shtrati i rrugës në aksin Qafë Plloçë – Qukës, me qëllim mundësimin e kalueshmërisë së sigurt.