Tre Plumba, Dy në Kokë: Detaje të Vrasjes së Biznesmenit në Elbasan
Janë zbardhur detaje të reja lidhur me ekzekutimin e biznesmenit Edmond Hyka, i njohur në Elbasan si Mondi Mëhalla. Ai u vra me dy plumba në kokë mbrëmjen e 30 nëntorit.
Sipas informacioneve fillestare, njëri nga atentatorët zbriti nga një automjet tip Audi dhe iu afrua Hykës sapo ky i fundit kishte hipur në automjetin e tij, një Range Rover, pranë karburantit në pronësi të viktimës. Atentatori qëlloi tre herë nga afër, ndërsa dy plumba e goditën viktimën në kokë, duke i shkaktuar vdekjen e menjëhershme.
Pak orë pas ngjarjes, automjeti i autorëve u gjet i djegur në fshatin Mirakë të Librazhdit. Kjo është një taktikë e zakonshme në ekzekutimet e mirëorganizuar për asgjësimin e provave.
Brenda automjetit të djegur nuk u gjet asnjë armë, çka sugjeron se grupi kishte planifikuar me kujdes kohën dhe itinerarin e arratisjes.
Deri më tani, rreth 10 persona janë shoqëruar për t’u marrë në pyetje. Drejtoria e Përgjithshme e Policisë ka ngritur një grup të posaçëm për të shqyrtuar pamjet filmike të kamerave të sigurisë në zonë dhe për të mbledhur provat e tjera materiale.
Ekspertët e kriminalistikës e kanë vlerësuar mënyrën e ekzekutimit si tipike për atentatet mafioze. Megjithatë, një nga pistat kryesore të hetimit lidhet me një konflikt të ndodhur pak ditë para ngjarjes, për motive ende të paqarta.
Menjëherë pas vrasjes, policia ngriti postblloqe në të gjitha daljet e qytetit dhe vijon kontrolle intensive në terren, duke përfshirë banesa, ambiente biznesi dhe rrugë dytësore.