Witkoff dhe Kushner takohen sot me Putin në Moskë
I dërguari special i Donald Trump, Steve Witkoff, dhe dhëndri i tij, Jared Kushner, do të zhvillojnë sot një takim në Moskë me presidentin rus Vladimir Putin. Bisedimet pritet të fokusohen në përpjekjet për t’i dhënë fund luftës në Ukrainë.
Zëdhënësi i Kremlinit, Dmitry Peskov, u ka bërë të ditur gazetarëve se takimi i Witkoff me Putinin do të zhvillohet në pjesën e dytë të ditës së martë. Ai megjithatë refuzoi të japë detaje mbi qëndrimet kyçe të Rusisë, duke theksuar se diplomacia “me megafon” nuk është e dobishme.
Putin ka deklaruar në vazhdimësi gatishmërinë për të negociuar paqen, por ka paralajmëruar se nëse Ukraina refuzon një marrëveshje, forcat ruse do të vazhdojnë përparimin dhe do të pushtojnë më shumë territor ukrainas.
Bisedimet aktuale kanë në qendër një plan prej 28 pikësh. Ky plan, i hartuar fillimisht nga Witkoff në bashkëpunim të ngushtë me Kremlinin, është rishikuar pas konsultimeve me udhëheqësit ukrainas dhe evropianë, me synimin për të pasqyruar më mirë pozicionin e Kievit.