Izraeli realizon shitjen historike: i dorëzon Gjermanisë sistemin mbrojtës raketor Arrow 3.
Izraeli ka dorëzuar zyrtarisht sot Gjermanisë sistemin e mbrojtjes raketore me rreze të gjatë veprimi Arrow 3, duke finalizuar kështu shitjen më të madhe të pajisjeve ushtarake në historinë e Izraelit, me një vlerë prej mbi 4 miliardë euro.
Ky është rasti i parë që sistemi Arrow 3 vendoset jashtë Izraelit dhe SHBA-së, dhe gjithashtu hera e parë që një vend tjetër do ta operojë plotësisht në mënyrë të pavarur.
Sistemi do të instalohet fillimisht në bazën ajrore Holzdorf, e cila ndodhet rreth 120 km në jug të Berlinit, ndërsa më vonë do të shtrihet edhe në zona të tjera.
Nga pala izraelite, në ceremoni marrin pjesë drejtues të lartë ushtarakë dhe përfaqësues të industrisë së mbrojtjes. Sipas mediave gjermane, ministri i Mbrojtjes, Boris Pistorius, dhe kancelari Friedrich Merz nuk do të jenë të pranishëm, por do të marrin pjesë zyrtarë të tjerë të lartë gjermanë nga fusha ushtarake dhe e mbrojtjes.
Arrow 3 është projektuar për të rrëzuar raketat balistike edhe jashtë atmosferës. Gjatë konfliktit 12-ditor me Iranin në qershor, ky sistem ka shkatërruar qindra raketa balistike të lëshuara nga Irani dhe nga grupi Houthi i mbështetur nga Teherani, me një shkallë suksesi prej 86%.
Kjo shitje është pjesë e iniciativës gjermane “European Sky Shield”, një mburojë ajrore evropiane, e cila synon forcimin e mbrojtjes ajrore të kontinentit pas pushtimit rus të Ukrainës.
Izraeli dhe Gjermania e konsiderojnë këtë marrëveshje si një simbol të bashkëpunimit të ngushtë dhe në rritje në fushën e mbrojtjes. Në këtë kuadër përfshihen edhe stërvitjet e përbashkëta ushtarake dhe shitja e sistemit izraelit të mbrojtjes aktive TROPHY për tanket gjermane Leopard 2. Tanket e para të pajisura me këtë sistem u dorëzuan muajin e kaluar për ushtritë gjermane dhe norvegjeze.