Spanjë: Zyrtar i partisë së kryeministrit Sanchez akuzohet për ngacmim seksual
Drejtësia spanjolle ka nisur një hetim ndaj një zyrtari lokal të Partisë Socialiste (PSOE), i akuzuar për ngacmim seksual. Ky rast përbën një sfidë për kryeministrin Pedro Sanchez, i cili është promovuar si një mbështetës i fortë i luftës kundër krimeve seksuale.
Hetimi paraprak, i zhvilluar nga prokuroria e Malagës, është drejtuar kundër Antonio Navarro, sekretar i përgjithshëm i PSOE-së në provincën e Torremolinos. Navarro dyshohet se, që nga viti 2021, i ka dërguar paditëses, e cila është gjithashtu anëtare e partisë në pushtet, qindra “mesazhe me përmbajtje seksuale sugjestionuese dhe të paprovokuara”.
Sipas gazetës El País, dega lokale e PSOE-së ka kërkuar pezullimin e anëtarësisë së Navarro-s në parti. Ai gjithashtu dyshohet se ka kryer veprime të paprovokuara ndaj paditëses.
Ky rast i ri vjen pas atij të Francisco Salajar, një ish-këshilltar në qeverinë e Sanchez, i cili gjithashtu përballet me akuza për ngacmim seksual nga disa ish-kolege. Ish-deputeti u detyrua të jepte dorëheqjen nga posti i tij në korrik.
Çështja, e cila ende nuk ka arritur në gjykatë, është ringjallur ditët e fundit pasi viktimat që e akuzuan atë folën me median për mungesën e reagimit nga zyra e kryeministrit kur ato denoncuan fillimisht veprimet e Salatár.
Sanchez ka vendosur luftën kundër dhunës ndaj grave dhe barazinë si prioritete të qeverisë së tij. Në vitin 2022, ai miratoi gjithashtu një ligj të rëndësishëm që përcakton konceptin e “pëlqimit”.
Në muajt e fundit, probleme ligjore janë shtuar rreth kryeministrit, i cili pretendon se këto janë sulme nga opozita e krahut të djathtë dhe ekstremit të djathtë.