INSTAT: 50% e të punësuarve fitojnë deri në 52 mijë lekë neto në muaj
Gjysma e të punësuarve marrin një pagë neto deri në 52,000 lekë në muaj (ekuivalente me 63,456 lekë bruto). Këto të dhëna zyrtare janë publikuar nga INSTAT dhe i referohen pagës mediane në tremujorin e tretë të vitit.
Paga mediane përfaqëson nivelin pagës që e ndan popullsinë e punësuar në dy grupe të barabarta: 50% e tyre fitojnë më pak se kjo shumë, ndërsa 50% tjetër fitojnë më shumë.
Ndryshe nga paga mesatare, e cila llogaritet duke mbledhur të gjitha pagat dhe duke i pjesëtuar me numrin e punonjësve, paga mediane nuk influencohet nga pagat ekstreme, qofshin ato shumë të larta apo shumë të ulëta. Për këtë arsye, paga mediane shihet si një tregues më përfaqësues i pagës tipike që merr shumica e punonjësve, sidomos në ekonomi si ajo shqiptare, ku ekzistojnë dallime të konsiderueshme mes pagave.
Të dhënat e INSTAT tregojnë një diferencë të ndjeshme mes pagës mediane dhe pagës mesatare. Paga mesatare mujore për tremujorin e tretë ishte rreth 83,300 lekë, duke qenë 31% më e lartë se paga mediane.