Jeta në Antarktidë, shkencëtarët publikojnë pamje unike të filmuara nga një pinguin
Shkencëtarët ukrainas nga Baza Kërkimore Vernadsky në Antarktidë kanë publikuar pamje të rralla dhe mbresëlënëse, të filmuara nga një pinguin. Këto pamje ofrojnë një këndvështrim unik mbi jetën nënujore të këtyre zogjve.
Përmes përdorimit të një gjurmuesi GPS dhe një kamere të vogël të vendosur me kujdes në shpinën e pinguinit, studiuesit arritën të regjistrojnë në kohë reale mënyrën se si pinguinët:
- Zhyten.
- Gjuajnë ushqim.
- Lëshojnë ajër nën krahët e tyre për të rritur shtytjen hidrodinamike.
- Lëvizin me shpejtësi nën ujë.
Pamjet tregojnë gjithashtu edhe mënyrën sesi ata rregullojnë pendët gjatë notit. Videoja është autentike, në kohë reale dhe e pamodifikuar, duke u dhënë studiuesve të dhëna të vlefshme mbi sjelljen natyrore të pinguinëve në mjedisin e tyre.
Ky studim u realizua në bashkëpunim me Institutin Polar Norvegjez dhe, sipas shkencëtarëve, ndihmon në verifikimin e të dhënave të mbledhura përmes GPS-it, si dhe në përpjekjet për mbrojtjen e ekosistemeve detare të Antarktidës.
Ekspertët theksojnë se teknologji të tilla ofrojnë mjete të reja për të kuptuar më mirë ndikimin e ndryshimeve mjedisore në faunën polare dhe për të përmirësuar strategjitë e ruajtjes së biodiversitetit në rajon.