Protestat në Iran zgjerohen, përleshje mes policisë dhe qytetarëve, dy efektivë të vdekur dhe mbi 2,000 të arrestuar
Të mërkurën në mbrëmje, përleshje të dhunshme mes protestuesve antiqeveritarë dhe forcave të sigurisë u përhapën në disa qytete të Iranit, ndërsa një valë trazirash e shkaktuar nga kriza ekonomike e vendit vazhdoi për të 11-tën ditë.
Agjencia gjysmëzyrtare e lajmeve Fars, e afërt me Gardën Revolucionare, raportoi se dy policë u qëlluan dhe u vranë nga individë të armatosur në qytetin jugperëndimor të Lordeganit. Video të postuara në mediat sociale treguan një përballje të tensionuar mes protestuesve dhe forcave të sigurisë, me zhurmën e të shtënave në sfond.
Në pamjet filmike nga disa zona të tjera, forcat e sigurisë duket se qëllojnë me armë dhe gaz lotsjellës drejt turmave të protestuesve, disa prej të cilëve hodhën gurë drejt policisë.
Deri më tani, protestat janë përhapur në 111 qytete dhe qyteza në të 31 provincat e Iranit. Të paktën 34 protestues dhe katër forca sigurie janë vrarë gjatë trazirave, ndërsa 2,200 protestues janë arrestuar.
Protestat filluan më 28 dhjetor, kur tregtarët dhe pronarët e dyqaneve dolën në rrugët e kryeqytetit, Teheran, për të shprehur zemërimin e tyre për një rënie tjetër të ndjeshme të vlerës së monedhës iraniane, rialit, kundrejt dollarit amerikan, ndërsa inflacioni ka shënuar rritje të ndjeshme.
Studentët e universitetit iu bashkuan shpejt protestave dhe ato filluan të përhapeshin në qytete të tjera, me turma që dëgjoheshin shpesh duke brohoritur slogane kundër Udhëheqësit Suprem të vendit, Ajatollah Ali Khamenei.