Rusia sulmon Ukrainën me raketa Oreshnik, duke pretenduar hakmarrje për sulmin ndaj rezidencës së Putinit
Rusia ka përdorur sistemin e saj më të fundit të raketave balistike hipersonike, Oreshnik, në një sulm të kohëve të fundit kundër objekteve të prodhimit të dronëve, infrastrukturës energjetike dhe disa objekteve të tjera ushtarake në Ukrainë. Kështu deklaroi Ministria e Mbrojtjes ruse në Moskë.
Sulmi i kryer gjatë natës erdhi si kundërpërgjigje ndaj një tentative “sulmi terrorist nga regjimi i Kievit” ndaj rezidencës së Presidentit rus, Vladimir Putin, në Rajonin Novgorod, sipas një deklarate të ministrisë të lëshuar të premten.
Më 28-29 dhjetor, Ukraina thuhet se ka lëshuar 91 drone me rreze të gjatë veprimi drejt kompleksit presidencial. Të gjitha dronët pretendon Moska, u rrëzuan nga mbrojtja ajrore, ndërsa Rusia premtoi hakmarrje.
Sipas ministrisë ruse, gjatë sulmit u përdorën edhe lloje të tjera të armëve me precizion të lartë, tokësore dhe detare, si dhe dronë.
Deklarata shtoi se objektivat e sulmit përfshinin objektet e prodhimit të dronëve dhe infrastrukturën energjetike që furnizon kompleksin ushtarako-industrial ukrainas. Sipas tyre, “objektivat e sulmit janë arritur”.
Ministria paralajmëroi se “asnjë nga veprimet terroriste të regjimit kriminal ukrainas nuk do të mbetet pa përgjigje”.