“`html
Dështon mbledhja e parë e Këshillit Mbikëqyrës të Bankës së Shqipërisë për shkak të mungesës së anëtarëve të rinj
Banka e Shqipërisë, në fund të vitit të kaluar, miratoi kalendarin e mbledhjeve të Këshillit Mbikëqyrës për vitin 2026. Sipas këtij kalendari, mbledhja e parë ishte parashikuar të mbahej ditën e sotme. Objektivi kryesor i kësaj mbledhjeje ishte informimi mbi aktivitetin e Bankës së Shqipërisë gjatë vitit 2025.
Megjithatë, për shkak të mungesës së kuorumit, mbledhja nuk u zhvillua siç ishte planifikuar. Në vend të saj, u zhvillua vetëm një takim informues mes anëtarëve ekzistues të Këshillit Mbikëqyrës.
Ndryshe nga praktika e viteve të mëparshme, ku kalendari vjetor i mbledhjeve miratohej në mbledhjen e parë të vitit, këtë herë Këshilli Mbikëqyrës e miratoi atë në mbledhjen e fundit të vitit. Ky vendim u mor për shkak të pritjes së mungesës së kuorumit për vendimmarrje në fillim të këtij viti.
Mbledhja e radhës është planifikuar të mbahet më 4 shkurt, ku do të shqyrtohet raporti tremujor i Politikës Monetare dhe do të merren vendime lidhur me normën bazë të interesit. Megjithatë, ka një mundësi të lartë që edhe kjo mbledhje të dështojë.
Kuvendi i Shqipërisë nuk e ka përfshirë në programin dyjavor të punës zgjedhjen e anëtarëve të rinj të Këshillit Mbikëqyrës. Sipas informacioneve nga Kuvendi, pritet që procesi të fillojë me dëgjesat e kandidatëve të aplikuar në javën e parë të shkurtit. Kjo do të thotë se zgjedhja e anëtarëve të rinj do të shtyhet për javët e ardhshme, dhe Këshilli Mbikëqyrës mund të arrijë kuorumin vendimmarrës, në rastin më të favorshëm, për mbledhjen e datës 4 mars.
Mandati i gjashtë anëtarëve të Këshillit Mbikëqyrës – Luljeta Minxhozi, Artan Hoxha, Violeta Staka, Edlira Luçi, Ridvan Bode dhe Suela Popa – përfundoi në dhjetor 2025. Sipas ligjit, anëtarët nuk mund të vazhdojnë të ushtrojnë detyrën pas përfundimit të mandatit.
Ligji “Për Bankën e Shqipërisë” kërkon që mbledhja e Këshillit Mbikëqyrës të zhvillohet me pjesëmarrjen e më shumë se gjysmës së anëtarëve të emëruar, duke përfshirë kryetarin ose zëvendëskryetarin. Për këtë arsye, që prej dhjetorit, Këshilli Mbikëqyrës nuk ka më kuorum dhe vendimmarrja në të është praktikisht e paralizuar.
Siç ndodh shpesh, procedurat për përtëritjen e Këshillit Mbikëqyrës dhe zgjedhjen e anëtarëve të rinj kanë nisur me vonesë. Tre nga vendet vakante duhet të plotësohen me propozim të Kuvendit, ndërsa tre të tjerat propozohen nga Këshilli i Ministrave.
Kuvendi ka mbyllur procedurën e aplikimit më 9 dhjetor, ku kanë shprehur interes 20 kandidatë. Ndërsa, Këshilli i Ministrave ka mbyllur pranimin e aplikimeve më 26 dhjetor, por nuk ka njoftuar ende listën e kandidatëve dhe as nuk i ka dërguar zyrtarisht Kuvendit propozimet e veta.
Ky nuk është rasti i parë kur procedurat për plotësimin e vakancave në institucionet rregullatore të tregut pësojnë vonesa. Këshilli Mbikëqyrës i Bankës së Shqipërisë u përball me një situatë të ngjashme në vitin 2018, para zgjedhjes së anëtarëve që së afërmi u përfundon mandati. Edhe atëherë, numri i mandateve të përfunduara ishte gjashtë, dhe mosplotësimi në kohë i vendeve vakante bllokoi për një periudhë të shkurtër vendimmarrjen në Këshillin Mbikëqyrës.
“`