“`html
Trafikuan 200 kg kokainë nga Amerika Latine, policia spanjolle godet klanin shqiptar
Policia Kombëtare e Spanjës ka arrestuar tetë anëtarë të një klani shqiptar të përfshirë në trafikun e drogës përmes anijeve me kontejnerë nga Amerika Latine. Pesë prej tyre u kapën duke drekuar në një restorant në Vigo, pak para se të merrnin një ngarkesë prej 200 kilogramësh kokainë që kishte mbërritur në port, e fshehur me metodën e “grepit të verbër”. Grupi ishte nën vëzhgim që nga viti 2024.
Një javë më vonë, tre bashkëpunëtorë të tjerë u arrestuan në Galicia. Operacioni, i emërtuar “Monterrey”, shkatërroi planin për futur kokainën në Spanjë dhe sekuestroi 20,000 euro. Udhëheqësi i këtij rrjeti rezultoi të jetë një “toger” i trafikantit të njohur Brian Colin Charrington, i cili vdiq në vitin 2025 dhe njihej si “lordi i drogës i Wikipedia”. Britaniku 68-vjeçar, banues në bregdetin e Alikantes, shpesh postonte video nga aktivitetet e tij në portale online dhe kishte të dhëna për arrestimet e tij në enciklopedinë e internetit për trafik droge në disa vende.
Charrington kishte lidhje edhe në Evropën Lindore dhe konsiderohej truri i një rrjeti që transportonte ngarkesa droge prej 1100 kilogramësh ose më shumë midis Surinamit dhe Valencias. Në vitin 2024, policia kishte shkatërruar një pjesë të rrjetit të tij dhe arrestuar 30 bashkëpunëtorë. Ai vdiq në korrikun e kaluar në një spital të Alikantes.
Policia spanjolle pohon se grupi shqiptar i lidhur me këtë trafikant droge kishte bashkëpunimin e një organizate galiciane për t’u vendosur në Galicia. Kjo ngarkesë ishte përpjekja e parë e organizatës për të kontrabanduar drogë përmes portit të Vigos. Pesë personat e arrestuar në Vigo janë lënë në paraburgim, të akuzuar për përfshirje në organizatë kriminale dhe trafikimin e drogës.
Hetimi nisi rreth dy vite më parë, kur autoritetet zbuluan një organizatë që përdorte metodën “grep i verbër”. Kjo metodë përfshin trafikimin e drogës brenda kontejnerëve të transportuar me anije mallrash dhe nxjerrjen e saj në mënyrë diskrete pasi anijet arrinin në destinacion. Dërguesi zakonisht ishte një kompani fiktive ose një biznes i ligjshëm që nuk ishte në dijeni të veprimtarisë.
Sipas Emilio Rodríguez, kreut të njësisë “Greco” në Galicia, bëhet fjalë për “organizata shumë të strukturuara dhe profesionale me degë në të gjithë botën”. Ai shtoi se ky klan me origjinë shqiptare ka kontakte në zonat e prodhimit të drogës dhe se këto organizata tashmë kontrollojnë zona të ndjeshme në disa porte, si dhe zona të prodhimit të kokainës. Pesë personat e arrestuar në Vigo përfshijnë tre shqiptarë, një francez, një letonez dhe disa galicianë, një aleancë që “u jep këtyre organizatave një kapacitet të madh operativ”, sipas medias.
“`