Thirrje në Gjermani për tërheqjen e arit prej 164 miliardë eurosh nga SHBA
Gjermania po përballet me kërkesa për të tërhequr miliarda euro ar nga depozitat amerikane. Kjo nismë është nxitur nga ndryshimi i marrëdhënieve transatlantike dhe paparashikueshmëria e Donald Trump.
Gjermania, e cila posedon rezervat e dyta më të mëdha kombëtare të arit në botë pas SHBA-së, ruan rreth 164 miliardë euro (122 miliardë paund), ose 1,236 tonë, në Nju Jork. Kjo shumë përbën 37% të rezervave të saj totale, të cilat arrijnë gati 450 miliardë euro.
Ekonomistë të shquar, si Emanuel Mönch, ish-kreu i kërkimit në Bundesbank, dhe Michael Jäger, kreu i Shoqatës Evropiane të Taksapaguesve, kanë argumentuar se mbajtja e arit në SHBA është tepër e “rrezikshme” nën administratën aktuale. Sipas tyre, riatdhesimi do të rriste “pavarësinë strategjike” të Gjermanisë.
Jäger theksoi se “Trump është i paparashikueshëm” dhe se rreziku që Bundesbanka të mos ketë më akses në arin e saj po rritet. Ky shqetësim, i cili më parë ishte kryesisht në diskutimet e krahut të djathtë ekstrem, tashmë ka hyrë në debatin kryesor.
Edhe zëdhënësja e financave të të Gjelbërve, Katharina Beck, mbështet zhvendosjen e shufrave të arit, duke i cilësuar ato si një “ankorë stabiliteti dhe besimi”.
Megjithatë, jo të gjithë janë dakord. Clemens Fuest, presidenti i Institutit për Kërkime Ekonomike (Ifo), ka paralajmëruar se një veprim i tillë mund të ketë pasoja të papritura dhe “vetëm do të hidhte benzinë në zjarrin e situatës aktuale”.
Presidenti i Bundesbankës, Joachim Nagel, dhe Frauke Heiligenstadt nga Social Demokratët, kanë shprehur qetësi, duke theksuar se rezervat e arit të Gjermanisë janë “të diversifikuara mirë”. Ata sqaruan se mbi gjysma e tyre gjenden në Frankfurt, ndërsa pjesa tjetër në Nju Jork dhe Londër, duke garantuar kështu aftësinë e vendit për të vepruar.
Pavarësisht këtyre sigurimeve, retorika e ashpër e Trump ka bërë që një numër në rritje i Kristian Demokratëve të Merz-it të shprehen në favor të riatdhesimit, duke konsideruar SHBA-në si një partner jo të besueshëm.
Marrë nga The Guardian