“`html
“Hov i ri” për ekonominë dhe angazhim për emigracionin: Gjermania dhe Italia intensifikojnë partneritetin
Pas konsultimeve qeveritare gjermano-italiane të zhvilluara në Romë, kancelari gjerman Friedrich Merz theksoi vullnetin për një bashkëpunim më të ngushtë mes dy vendeve. Ai deklaroi në një konferencë shtypi të përbashkët me kryeministren italiane Giorgia Meloni se Gjermania dhe Italia janë dakord për një “politikë të angazhuar migracioni” dhe për t’i dhënë një “hov të ri” ekonomisë.
Merz shtoi se synohet gjithashtu një “dinamikë e re” në bashkëpunimin e industrisë së armatimeve të të dy vendeve. Ai vlerësoi lart partneritetin gjermano-italian, duke theksuar: “Ne mundëm të konstatojmë se Gjermania dhe Italia në vitin 2026 janë kaq afër si asnjëherë më parë në historinë tonë të përbashkët. Ekziston një shkallë shumë e lartë përputhshmërie mes Gjermanisë dhe Italisë në vlerësimin e sfidave me të cilat përballemi së bashku.”
“Objektiva edhe më ambicioze”
Kryeministrja Meloni nënvizoi se Gjermania dhe Italia i kanë vendosur vetes “objektiva edhe më ambicioze”. Lidhur me politikën e përbashkët të mbrojtjes, ajo, duke iu referuar qeverisë së SHBA-së nën presidentin Donald Trump, tha se ajo dhe Merz janë të mendimit që shtetet europiane nuk duhet të pyesin “ç’mund të bëjnë të tjerët për ne, por ç’mund të bëjmë ne”.
Më herët, Merz shpjegoi në platformën X se Gjermania dhe Italia qëndrojnë “pranë si asnjëherë më parë” dhe punojnë “për një Europë të bashkuar dhe një NATO të fortë”.
“Pa hierarki”
Në partneritetin me Italinë, Merz nuk sheh ndonjë konkurrencë ndaj raporteve gjermano-franceze. “Për Gjermaninë nuk ka hierarki në marrëdhënie,” theksoi kancelari. “Ne gëzohemi për çdo vend, me të cilin kemi të tilla marrëdhënie të ngushta partneriteti, ashtu si me Francën edhe me Italinë. Ne e dimë, që vetëm të gjithë bashkë mund ta përshkojmë rrugën në këtë Bashkim Europian.”
Gjatë ditëve të fundit ka pasur spekulime se Merz mund t’i japë përparësi në të ardhmen bashkëpunimit me kryeministren e djathtë të Italisë, Giorgia Meloni, krahasuar me presidentin e Francës Emmanuel Macron. Së fundi, janë vënë re qëndrime të ndryshme ndërmjet Berlinit dhe Parisit lidhur me çështje të ndryshme. Të dy vendet, Gjermania dhe Franca, që nga viti 1963 janë të lidhur ngushtë përmes Marrëveshjes së Miqësisë gjermano-franceze dhe konsiderohen si “motori” brenda BE-së.
“`