Dolën në pistën e avionit dhe shkaktuan trazira në Brindisi, 3 shqiptarë nën hetim
Nata mes 6 dhe 7 janarit u shndërrua në kaos në aeroportin e Brindisit. Dy fluturime të kompanisë Wizz Air me destinacion Tiranën, të nisur nga Bergamo dhe Bolonja, u detyruan të devijoheshin drejt aeroportit të Salentos për shkak të kushteve të këqija të motit në Shqipëri.
Ky vendim shkaktoi reagim të ashpër nga një pjesë e pasagjerëve. Ata u mblodhën në pistën e aeroportit, duke detyruar ndërhyrjen e forcave të rendit për rivendosjen e qetësisë dhe sigurisë.
Sipas autoriteteve italiane, tre persona me origjinë shqiptare, të identifikuar përmes kamerave të sigurisë, dyshohet se kanë pasur rol kyç në përshkallëzimin e trazirave. Sjellja e tyre agresive dhe aftësia për të nxitur pasagjerë të tjerë të bashkoheshin me protestën janë theksuar nga autoritetet.
Prokuroria e Brindisit ka nisur hetime ndaj tyre për disa vepra penale, përfshirë:
- Prishje të shërbimit publik
- Sulm dhe kërcënime ndaj një zyrtari publik
- Dëmtim të rëndë të pronës publike
- Pushtim arbitrar i ambienteve publike
- Shkelje të rregulloreve të sigurisë aeroportuale
Tre të dyshuarit u identifikuan gjatë kontrolleve kufitare në terminalin e Costa Morena-s, ndërsa po përgatiteshin të hipnin në tragetin drejt Vlorës.
Ndërkohë, pasagjerët e tjerë u përballën me orë të tëra tensioni, pasi u detyruan të braktisnin udhëtimin ajror drejt Shqipërisë. Sipas Corriere, në fund, të gjithë pasagjerët u kthyen në Shqipëri me mjete alternative udhëtimi.