“`html
Hetimi i “Hijenave”: 30 milionë euro grabitje në muaj nga Tirana, falë telefonatave mashtruese
Operacioni i Byrosë Kombëtare të Hetimit (BKH) kundër një grupi kriminal që mashtronte mijëra qytetarë evropianë nga zyra të stërmbushura në zemër të Tiranës, u dokumentua në një reportazh investigativ italian. Gazetari Luigi Pelazza, në emisionin “Le Iene”, ka sjellë një rrëfim të detajuar mbi mënyrën se si ky operacion kompleks u dekonspirua dhe si aktivitetet e paligjshme gjenin strehë në kullat luksoze të Tiranës.
Reportazhi nxjerr në pah pamjet e përftuara nga një person i infiltruar brenda call center-it mashtrues, ku identifikohen drejtuesit kryesorë të grabitjeve online. Grupi kriminal përbëhej nga shtetas shqiptarë dhe italianë, ndërsa fitimet marramendëse realizoheshin nga punonjës të rekrutuar në Itali.
Gazetari italian ka dorëzuar pranë SPAK materialet e siguruara nga i infiltrau. Ky veprim ka çuar në përgjime të mëtejshme dhe në organizimin e një operacioni për arrestimin e dhjetëra personave. Pamjet e ndërhyrjes së SPAK dhe BKH në kullën “4 Ever Green Tower” dokumentojnë momentet e para të hyrjes në godinë dhe arrestimin e disa bashkëpunëtorëve.
Sipas gazetarit Pelazza, nga këto zyra organizohej një skemë mashtrimi që arrinte të nxirrte nga qytetarë italianë, gjermanë apo francezë, shifra marramendëse, duke shkuar nga 20 deri në 30 milionë euro në muaj.
Mënyra e Mashtrimit:
- Mashtrimi fillonte me një telefonatë nga një “konsulent financiar”, i cili prezantohej si përfaqësues i një platforme investimi online.
- Viktimave u premtoheshin fitime të shpejta me një investim fillestar prej 250 eurosh.
- Më pas, përmes grafikëve të manipuluar, u shfaqeshin shifra fiktive fitimi, duke i shtyrë të investonin gjithnjë e më shumë.
- Në momentin që viktimat përpiqeshin të tërhiqnin paratë, operatorët zhdukeshin.
Hetimi, i nisur që në shtator, zbulon se rekrutimi i operatorëve kryhej në Itali nga ish-polici italian Alfonso Vicinanza, i cili i shoqëronte personalisht të rinjtë në Shqipëri, i sistemontë në apartamente të paguara dhe i dërgonte në call center-in mashtrues në Tiranë.
Drejtoresha e Call Center-it dhe Shefi Italian:
Në video identifikohet drejtoresha e call center-it në kullën “Atti Tower”, e njohur si Alma. Përmes komunikimeve në “Telegram”, ajo përshkruan pa rezerva përmasat e aktivitetit kriminal: “Kjo është një kompani shumë e madhe në Tiranë, kemi një prodhim shumë të madh. Agjentët e rinj bëjnë 300-400 mijë euro. Deri në një milion pa asnjë problem,” i shpjegon ajo të infiltruarit.
Sipas Pelazza-s, në dy kate të kullës punonin rreth 50 operatorë, të ndarë sipas shteteve europiane që mashtronin. Gazetari i “Le Iene” u infiltrua si punonjës, duke u paraqitur si i interesuar për punë.
Menaxheri italian, Carlo, i shpjegon hapur rregullat e mashtrimit: “Gjëja e parë e rëndësishme: mendo një emër mbiemër arti, atë të vërtetin nuk duhet ta dinë. … Duhet të krijosh empati.” Një tjetër operator tregon se fitimet personale janë të jashtëzakonshme: “Unë muajin e kaluar bëra 35 mijë euro.”
Operacioni dhe sfidat e tij:
Kulmi i rrëfimit televiziv ishte përgatitja e ndërhyrjes së SPAK. Prokurori Vladimir Mara nisi procedurat, por hasi një problem: kamerat e sigurisë brenda dhe jashtë kullës kontrolloheshin nga ambasada izraelite. Ekzistonte frika se nëse personeli i sigurisë do të shikonte agjentë të armatosur, mund të bllokohej ndërhyrja, duke u dhënë kohë mashtruesve të zhduknin provat.
Operacioni u ndërpre për pak kohë nga një agjent i ambasadës izraelite, por ai u neutralizua menjëherë. Një agjent i BKH-së identifikon objektivin kryesor: “Në këtë pozicion këtu qëndron Alma. Ajo është drejtoresha e call center-it,” duke theksuar nevojën për kapjen e shpejtë të telefonave dhe kompjuterave për të mundur aksesimin e programeve të bitcoin me miliona euro.
Megjithatë, kur agjentët arritën në katin e 13-të, zyrat ishin bosh. “Janë hequr gjatë natës,” u tha menaxherit Carlos, i cili u përgjigj thatë: “Se di, unë nuk di asgjë.” E njëjta situatë u përsërit edhe në katin e 9-të. Tavolina dhe karrige të braktisura, por asnjë kompjuter.
Pamjet e kamerave, por edhe pronari i kullës, treguan se punonjësit kishin bllokuar ashensorët dhe kishin zbritur pajisjet në garazh për t’i transferuar në furgonë. Falë teknologjisë së survejimit urban, SPAK gjurmoi furgonët dhe i ndoqi deri në kullën “Downtown One”. Aty policia ndërhyri dhe kapi pesë persona në flagrancë duke tentuar të fshinin mijëra të dhëna nga kompjuterët.
Në të njëjtën godinë u zbulua edhe një hapësirë tjetër gjigande, me qindra kompjuterë gati për t’u kthyer në një call center të ri mashtrues, i cili u ndal para se të fillonte aktivitetin.
Reportazhi i Luigi Pelazza-s përfundon duke theksuar se, pavarësisht dekonspirimit të pjesshëm, operacioni i SPAK arriti objektivin, duke çmontuar një strukturë kriminale ndërkombëtare dhe duke hapur rrugën për rikuperimin e një pjese të parave të vjedhura nga mijëra qytetarë evropianë.
“`