Kolumbi: Makinë-bombë shpërthen, Presidenti Espirella deklaron: “Nuk do të gjunjëzohemi para dhunës, rivendosja e rendit ka filluar.”
Një makinë-bombë shpërtheu në një pikë pagese në Autostradën Pan-Amerikane, në jugperëndim të Kolumbisë, duke shkaktuar dëme të konsiderueshme materiale. Sulmi ndodhi vetëm një ditë pasi presidenti i ri i vendit, Abelardo de la Espriella, u betua në detyrë.
Ushtria kolumbiane akuzoi për shpërthimin fraksione të shkëputura nga ish-grupi rebel FARC. Ngjarja nxjerr sërish në pah kërcënimin e grupeve të armatosura në rajonet e Kolumbisë, ku fraksione të ish-FARC dhe organizata të tjera të armatosura vazhdojnë të jenë aktive.
Autoritetet kanë nisur menjëherë hetimet për të përcaktuar përgjegjësit e sulmit dhe motivet e tij. Ata deklaruan se sulmi kishte në shënjestër një pikë pagese në Autostradën Pan-Amerikane, në departamentin bregdetar të Caucës.
Dëshmitarët raportojnë se dy roje sigurie pësuan lëndime të lehta nga shpërthimi. Një dëshmitar tregoi se sulmuesi la makinën e tij në vendngjarje dhe u largua me motoçikletë.
Administrata e Presidentit de la Espriella u zotua për një reagim të fortë ndaj këtij akti terrorist. Ministrja e Transportit, Elsa Noguera, në një postim në rrjetet sociale, deklaroi: “Kolumbia nuk do të gjunjëzohet para dhunës, as nuk do të lejojë shkatërrimin e infrastrukturës që lidh rajonet tona.”
Ajo shtoi, duke iu referuar fjalimit inaugurues të Presidentit de la Espriella, ku ai u zotua të “mposhte narkoterrorizmin” dhe të frenonte aktivitetin kriminal: “Siç tha dje Presidenti Abelardo de la Espriella, koha për rivendosjen e rendit ka filluar. Ne do të rimarrim sigurinë, kontrollin e territoreve tona dhe qetësinë shpirtërore të kolumbianëve.”
Presidenti i linjës së ashpër, i cili u inaugurua të premten, kishte bërë fushatë me premtimin për të goditur fort grupet e armatosura në Kolumbi.