Kuba: Nuk jemi kërcënim, jemi të hapur për dialog me SHBA-të
Nën presionin në rritje nga ana e Shteteve të Bashkuara, qeveria kubane ka mohuar akuzat se përbën një kërcënim për sigurinë amerikane dhe ka theksuar gatishmërinë e saj për dialog dhe bashkëpunim me Uashingtonin.
Ministria e Jashtme e Kubës lëshoi të hënën një deklaratë ku bën thirrje për dialog dhe nënvizon se vendi nuk mbështet “terrorizmin”. Ky reagim vjen në një periudhë tensionesh të shtuara, veçanërisht pas ngjarjeve të fundit në Venezuelë, të cilat lidhen me politikën e presidentit amerikan Donald Trump për dominimin e Hemisferës Perëndimore.
“Populli kuban dhe populli amerikan përfitojnë nga angazhimi konstruktiv, bashkëpunimi ligjor dhe bashkëjetesa paqësore,” thuhet në deklaratën zyrtare nga Havana. “Kuba riafirmon gatishmërinë për një dialog të respektueshëm dhe reciprok me qeverinë e Shteteve të Bashkuara, të bazuar në interes të ndërsjellë dhe në të drejtën ndërkombëtare.”
Deklarata u publikua vetëm disa orë pasi Trump njoftoi se kontaktet diplomatike me Kubën janë rifilluar, duke thënë se administrata e tij po komunikon me “nivelet më të larta” të qeverisë kubane. Trump deklaroi për gazetarët: “Kuba ka qenë një shtet i dështuar prej shumë kohësh. Tani nuk ka më Venezuelën për ta mbajtur në këmbë.”
Venezuela, e cila ishte furnizuesi kryesor i Kubës me energji, ka përjetuar ndërprerje të furnizimeve me naftë pas ngjarjeve të fundit. Shtetet e Bashkuara kanë sekuestruar gjithashtu cisterna venezueliane me naftë në Karaibe, një veprim që është kritikuar nga disa si akt piraterie.
Kuba kishte lidhje të ngushta ekonomike dhe të sigurisë me qeverinë e Venezuelas. Administrata Trump ka ushtruar presion edhe ndaj Meksikës për të ndalur furnizimin e Kubës me naftë, duke nxitur shqetësime për një krizë të mundshme humanitare në ishull.
Marrëdhëniet mes Uashingtonit dhe Havanës kanë qenë armiqësore që prej revolucionit komunist të vitit 1959. Në vitin 2021, Trump e përfshiu Kubën në listën e “shteteve sponsorizuese të terrorizmit”. Së fundmi, Shtëpia e Bardhë e cilësoi qeverinë kubane si një “kërcënim të pazakontë dhe të jashtëzakonshëm” për SHBA-të, duke e akuzuar për bashkëpunim me “aktorë keqdashës” si Kina dhe Rusia. Këto akuza u mohuan kategorikisht nga autoritetet kubane.
Trump ka sugjeruar se një nga kërkesat kryesore të administratës së tij lidhet me trajtimin e komunitetit kubano-amerikan në SHBA, një elektorat i rëndësishëm për republikanët në Florida. Sekretari amerikan i Shtetit Marco Rubio mbështet këtë linjë të ashpër ndaj Amerikës Latine.
Tensionet janë ndjekur me shqetësim edhe nga Vatikani. Papa deklaroi se është i alarmuar nga përshkallëzimi i situatës dhe u bëri thirrje palëve për dialog të sinqertë, për të shmangur dhunën dhe vuajtjet e mëtejshme të popullit kuban.