“`html
Gaz Paja pezullon kompaninë që e bëri investitor strategjik
Gazmend Paja, i njohur për rolin e tij në programin kabaret “Portokalli”, ka vendosur të pezullojë veprimtarinë e kompanisë përmes së cilës fitoi statusin e “investitorit strategjik” për ndërtimin e një kompleksi turistik në Dhërmi, me një vlerë prej rreth 14 milionë euro.
Më 19 janar të këtij viti, ai njoftoi Qendrën Kombëtare të Biznesit (QKB) për vendimin e tij për të pezulluar për një afat të pacaktuar veprimtarinë tregtare të shoqërisë “Echotec Energy Service”. Dokumenti zyrtar nuk jep arsye specifike për këtë vendim, megjithatë, ky veprim i Gaz Pajës ngre pikëpyetje mbi të gjithë procesin e shpalljes së tij si “investitor strategjik”.
Nga aktor në investitor strategjik
Gazmend Paja, krahas karrierës së tij si aktor në “Portokalli”, ka ushtruar edhe aktivitet privat në fushën e beach-bar, në zonën e Dhërmiut. Ai njihet gjithashtu për lidhjet e tij publike me kryeministrin Edi Rama dhe ish-kryebashkiakun e Tiranës, Erion Veliaj. Aktori nuk e ka fshehur kurrë miqësinë me Veliajn dhe ka marrë pjesë në fushatat elektorale për Partinë Socialiste në Tiranë.
Emri i Pajës figuron edhe në dosjen hetimore të Prokurorisë së Posaçme (SPAK) ndaj ish-kryebashkiakut të Tiranës. Sipas SPAK, Veliaj kishte fshehur një apartament në zonën rezidenciale “Kodra e Diellit” në Tiranë, pronë e cila më parë ishte përdorur nga Gazmend Paja. Për këtë çështje, Veliaj akuzohet për “fshehje pasurie”, ndërsa ndërtuesi Gentian Sula për përpjekje për fshehje të gjurmëve të veprës penale. Gazmend Paja, pas deklarimeve të dhëna në Prokurori, ka shprehur përjashtimin e tij nga çdo dyshim.
Historia e projektit “Dhërmi Resort”
Në vitin 2019, Komiteti i Investimeve Strategjike (KIS), i drejtuar nga kryeministri Rama, miratoi statusin e investitorit strategjik për projektin “Dhërmi Resort”. Sipas vendimit, projekti do të realizohej nga kompanitë “Startek” dhe “Echotec Energy Service” me një vlerë të përllogaritur prej rreth 14 milionë euro. Dokumentet zyrtare tregojnë se kompleksi turistik do të ndërtohej në një sipërfaqe prej 133 mijë metra katrorë, në territorin e Himarës. Një nga dy kompanitë, “Echotek Energy Services”, rezulton në pronësi të Gazmend Pajës.
Pas miratimit të këtij vendimi, opozita dhe ekspertë ligjorë ngritën dyshime se Gazmend Paja mund të ishte thjesht një “prestanome” për të favorizuar lidhjet e tij politike me Ramën dhe Veliajn. Megjithatë, këto akuza mbetën në nivelin e deklaratave publike.
Paja i dha “gaz” investitorit strategjik
Historia e projektit strategjik “Dhërmi Resort” daton që nga viti 2017, kur kompania “Startek” aplikoi e vetme për statusin e investitorit, por aplikimi dështoi pasi projekti u konsiderua “i pamaturuar”.
Më pas, në prill 2019, Gazmend Paja bleu nga Alket Cakaj aksionet e shoqërisë “Echotec Energy Services” për vetëm 100 lekë të reja. Kjo kompani, e krijuar në vitin 2017, ka pasur si objekt veprimtarie pastrimin e depozitave të hidrokarbureve dhe aktivitete të ndryshme ndërtimi. Gjatë gjithë ekzistencës së saj, “Echotec Energy Services” nuk ka publikuar asnjë bilanc tregtar dhe nuk dihet nëse ka pasur aktivitet real.
Vetëm pesë muaj pas blerjes së aksioneve nga Paja, “Echotec Energy Services”, së bashku me “Startek”, aplikuan sërish për statusin e “investitorit strategjik” me projektin “Dhërmi Resort”. Përfshirja e Gaz Pajës në aplikim rezultoi vendimtare, pasi Komiteti i Investimeve Strategjike miratoi statusin e investitorit. Përfshirja e një kompanie si “Echotek Energy Services”, me bilance të pazbuluara dhe të blerë për një vlerë minimale, nuk ngriti alarm tek institucionet ligjzbatuese për një skemë të mundshme pastrimi parash.
Tashmë, shtatë vite pas fitimit të statusit të “investitorit strategjik”, Gazmend Paja ka vendosur të pezullojë veprimtarinë e kompanisë.
“`