Gjykata e Lartë lë në burg përjetë Ardjan dhe Florenc Çapjan
Gjykata e Lartë ka vendosur sot, më 5 shkurt, të lërë në fuqi dënimet për personat e përfshirë në një nga ngjarjet më të rënda kriminale në Elbasan. Ngjarja në fjalë, e ndodhur në vitin 2012, çoi në vrasjen brutale të Gentian Beqirit dhe Nezir Beqirit, babë e bir, brenda banesës së tyre.
Sipas vendimit të fundit të Gjykatës së Lartë:
- Ardjan Çapja, Florenc Çapja dhe Olsi Leka do të vuajnë dënimin me burgim të përjetshëm për përfshirjen në këtë vrasje.
- Klajdi Dokoli dhe Etjen Cani janë dënuar secili me 25 vite burg.
- Ervis Bardhi, personi që bashkëpunoi me drejtësinë, ka marrë një dënim më të lehtë, 15 vjet heqje lirie.
Ky vendim rrëzon të gjitha rekursat e paraqitura nga të akuzuarit dhe konfirmon vendimin e Apelit të Posaçëm të datës 15 nëntor 2023, raporton gazetarja e Klan News, Glidona Daci.
Dokumentet e gjykatës sugjerojnë se dyshimet kryesore për vrasjen e Gentian dhe Nezir Beqirit lidhen me veprime të organizuara dhe planifikuara nga një grup kriminal. Anëtarët e këtij grupi akuzohen edhe për prodhim dhe mbajtje pa leje të armëve, si dhe përdorim të armëve të ftohta.
Ngjarja ndodhi në banesën e Gentian Beqirit, i cili në atë kohë ndodhej në arrest shtëpie. Ai ruhej nga dy punonjës policie që mbikëqyrnin hyrjen e pallatit. Duke shfrytëzuar një moment kur njëri prej policëve u largua për nevoja personale dhe tjetri po ushqehej, Etjen Cani dhe Elvis Bardhi arritën të futeshin në apartament. Brenda shtëpisë, babai i Gentianit, Nezir Beqiri, u sulmua brutalisht në korridor dhe pësoi një infarkt fatal. Ndërkohë, Gentian Beqiri u qëllua disa herë në trup dhe kokë teksa ishte shtrirë në krevat.
Përdorimi i një arme me silenciator dhe largimi i shpejtë nga vendi i ngjarjes bënë që dy policët jashtë derës të mos vënë re asgjë. Më vonë, kur punonjësit e policisë kontrolluan apartamentin, gjetën të dy viktimat pa jetë.
Ngjarja shkaktoi tronditje në atë kohë dhe nxori në pah neglizhencën e punonjësve të sigurisë, të cilët më vonë u akuzuan për shpërdorim detyre.
Gjatë hetimeve, Ervis Bardhi ka dhënë informacione të detajuara mbi ngjarjen, duke shpjeguar sesi ishte planifikuar dhe ekzekutuar vrasja. Sipas tij, grupi veproi me një organizim të qartë dhe me qëllim eliminimin e Gentian Beqirit, për motive të mëparshme të konflikteve midis familjeve dhe interesave kriminale.