Hungaria drejt zgjedhjeve në pranverë, Trump mbështet hapur aleatin Viktor Orbán
Presidenti amerikan Donald Trump, ka shprehur mbështetje për kryeministrin hungarez Viktor Orbán në një postim në platformën Truth Social, përpara zgjedhjeve kyçe të prillit, ku udhëheqësi hungarez përballet me sfidën e mundshme të humbjes së kontrollit të pushtetit.
Orbán ka qenë në krye të Hungarisë që nga viti 2010, duke qeverisur me shumicë të theksuar. Megjithatë, sondazhet më të fundit tregojnë se Partia Tisza e Péter Magyar po fiton terren dhe përbën një sfidë serioze për kryeministrin aktual.
Donald Trump ka një histori të qartë të mbështetjes aktive ndaj aleatëve të tij politikë konservatorë të krahut të djathtë. Ai ka mbështetur, mes të tjerash, politikanët japonez Sanae Takaichi dhe argjentinas Javier Milei gjatë fushatave të tyre elektorale, të cilët më pas dolën fitues.
Një Strategji Kombëtare e Sigurisë e SHBA-së, e cila ka nxitur debate, thekson se Uashingtoni mbështetet te forcat nacionaliste të ekstremit të djathtë në Evropë për të parandaluar “rënien e qytetërimit” në kontinent.
“Kam mbështetur me krenari Viktorin në zgjedhjet e vitit 2022 dhe është një nder ta bëj këtë përsëri”, ka deklaruar Trump të enjten. Ai e ka përshkruar Orbán-in si një mik të vërtetë, një luftëtar dhe fitues, duke vlerësuar veçanërisht qëndrimin e tij strikt ndaj migracionit të paligjshëm.
Në janar, Trump i kishte dërguar një letër Orbánit, ku sugjerohej një vizitë në Hungari përpara zgjedhjeve. Megjithatë, ende nuk është caktuar një datë zyrtare.
Më herët gjatë javës, Orbán shprehu synimin për ta “joshur” Trumpin për një vizitë në Hungari, duke shtuar se një samit në Budapest mes SHBA-së, Rusisë dhe Ukrainës mbetet një mundësi.
“Ekziston gjithashtu një marrëveshje e përcaktuar që kam bërë me presidentin amerikan dhe presidentin rus, e cila parasheh që nëse ka përparim dhe zhvillohet një samit paqeje, ai do të mbahet në Budapest”, ka thënë Orbán.
Sipas anketuesit të Qendrës Kërkimore 21, partia Tisza kryeson me 35% të votave, ndërsa koalicioni qeverisës Fidesz-KDNP ka 28%. Zgjedhjet janë parashikuar të mbahen më 12 prill.