OKB: Pesë atentate kundër presidentit Al Sharaa dhe ministrave sirianë u penguan brenda një viti
Autoritetet siriane kanë parandaluar pesë tentative për vrasjen e presidentit të Sirisë ose të ministrave të tij gjatë vitit të kaluar. Këto të dhëna vijnë nga një raport i Kombeve të Bashkuara mbi aktivitetin e Shtetit Islamik.
Sipas raportit, presidenti sirian Ahmed al-Saraa ka qenë dy herë objektiv i atentateve, nga grupi Saraya Ansar al-Sunnah, i lidhur me Shtetin Islamik. Një nga atentatet ishte planifikuar në Aleppo dhe tjetri në Daraa.
Ky grup kishte kryer edhe një sulm me bombë në një kishë në Damask verën e kaluar. Një zyrtar rajonal i shërbimeve të inteligjencës kishte konfirmuar vjeshtën e kaluar se ndaj Al-Saraas ishin planifikuar tentativa për atentat, të cilat u penguan pas informacioneve të siguruara nga një vend fqinj dhe të ndara me shërbimet siriane.
Raporti thekson se Shteti Islamik ka intensifikuar rekrutimet pas rrëzimit të regjimit të Bashar al-Assad në dhjetor 2024. Ata e kanë cilësuar Al-Saraan “tradhtar”, pasi ai kishte udhëhequr një grup islamist rebel.
Raporti i OKB-së, i cituar nga The Guardian, nënvizon gjithashtu se Shteti Islamik po fokusohet në destabilizimin e qeverisë së re në Damask, duke “shfrytëzuar në mënyrë aktive boshllëqet e sigurisë dhe pasigurinë” në vend. Sipas dokumentit, Al-Saraa ka qenë “objektivi kryesor” i organizatës në Siri.