OKB: Shteti Islamik kreu 5 atentate kundër al-Sharaah dhe ministrave të tij
Shteti Islamik ka kryer pesë atentate kundër personave të lartë, përfshirë presidentin sirian Ahmed al-Sharaa dhe ministrat e tij, gjatë vitit të kaluar. Kjo bëhet e ditur nga një raport i Organizatës së Kombeve të Bashkuara (OKB) për Shtetin Islamik.
Raporti thekson se presidenti sirian, Ahmed al-Sharaa, ishte shënjestër dy herë. Një atentat u zhvillua në Alepo dhe një tjetër në Daraa, të kryera nga grupi Saraya Ansar al-Sunnah, i cili rezulton të jetë pjesë e Shtetit Islamik dhe më parë kishte kryer një bombardim në një kishë në Damask verën e kaluar.
Mediat raportojnë se vjeshtën e kaluar, një zyrtar i inteligjencës rajonale konfirmoi se al-Sharaa i kishte shpëtuar disa tentativeve për ta vrarë. Këto sulme u penguan falë informacionit inteligjent që një shtet fqinj i dha shërbimeve inteligjente siriane.
Që nga rënia e qeverisë së Asadit në dhjetor 2024, Shteti Islamik ka shtuar rekrutimin e anëtarëve të tij. Ky grup e cilëson al-Sharaa, i cili drejton një grup rebel islamist, si “dezertor”.
Shteti Islamik po përqendrohet në destabilizimin e qeverisë së re në Damask dhe po shfrytëzon në mënyrë aktive boshllëqet dhe pasiguritë e sigurisë në vend. Raporti përfundon duke theksuar se al-Sharaa ishte objektivi kryesor i Shtetit Islamik në Siri.