Irani nuk do të lejohet kurrë të pajiset me armë bërthamore, thotë Rubio. Trump është i gatshëm të takohet me Khamenein.
Presidenti i Shteteve të Bashkuara, Donald Trump, është i gatshëm të zhvillojë një takim me udhëheqësin suprem të Iranit, Ali Khamenei, për të zgjidhur mosmarrëveshjet mes dy vendeve. Sekretari i Shtetit amerikan, Marco Rubio, deklaroi se kjo nuk nënkupton pajtim me politikat e Khameneit, por besimin se dialogu është mënyra për zgjidhjen e problemeve.
Duke folur për programin bërthamor iranian, Rubio theksoi qartë se Iranit nuk do t’i lejohet kurrë të prodhojë armë bërthamore. Ai shpjegoi se kjo masë përbën një kërcënim serioz jo vetëm për Shtetet e Bashkuara dhe Evropën, por edhe për sigurinë globale dhe rajonale.
“Nuk ka dyshim për këtë. Ne gjithashtu duam të kemi praninë e forcave tona në rajon, pasi Irani ka treguar gatishmëri dhe aftësi për të sulmuar objektiva amerikane. Duke pasur parasysh bazat tona në rajon, të cilat janë aty falë aleancave tona, dhe duke pasur parasysh historikun e Iranit në sulme dhe kërcënime ndaj bazave tona, ne duhet të kemi forcë të mjaftueshme zjarri për të siguruar që ata të mos bëjnë një gabim që mund të çojë në diçka më të madhe,” tha Rubio.