“`html
Makina me qira për t’u fshehur: Si organizohej trafiku i njerëzve Gjirokastër-Muriqan
Elsona Çoba, 35-vjeçarja e arrestuar nga Policia e Tiranës pasi u kap duke transportuar 6 emigrantë të jashtëligjshëm, dyshohet se prej tre vitesh është e përfshirë në këtë skemë të jashtëligjshme.
Gazetarja Xhensila Kodra raporton se Çoba, me origjinë nga Laçi por banuese në Rrogozhinë, nuk ka pranuar që të flasë përpara grupit hetimor, për të treguar rrjetin e trafikantëve që kalojnë emigrantët nga vendet e treta nga Shqipëria drejt Malit të Zi.
Burime nga grupi hetimor bëjnë me dije se e reja merrte nga 2500 euro për çdo emigrant që e transportonte nga Gjirokastra deri në Muriqan. Pasi ndalonin disa orë në Vorë, emigrantët futeshin në makina të tjera dhe më pas niseshin drejt Shkodrës, në Muriqan. Atje, ata merreshin nga grupe të tjera kriminale që i kalonin në shtete të tjera, me destinacion final Italinë.
Të paktën dy persona të tjerë po hetohen nga policia, pasi ka dyshime se janë të përfshirë në të njëjtin grup me 35-vjeçaren.
Elsona Çoba merrte deri në 3 makina me qira në Tiranë, Rinas ose në Fushë-Krujë për të bërë shpërndarjen e emigrantëve. Ata merrnin mjete me qira në vende të ndryshme për të mos i rënë në sy policisë.
Emigrantët që u kapën në këtë operacion janë nga Egjipti dhe Jemeni.
“`