Reuters: Rama kërkon të pengojë gjyqësorin të shkarkojë ministrat
Kryeministri i Shqipërisë, Edi Rama, ka deklaruar se qeveria e tij do të ndryshojë ligjin për të mbrojtur ministrat nga pezullimi gjatë hetimeve penale. Kjo lëvizje ka nxitur akuzat nga opozita, e cila pretendon se Rama po përpiqet të mbrojë veten dhe të cenojë pavarësinë e sistemit gjyqësor.
Në nëntor, një gjykatë pezulloi nga detyra zv/kryeministren Belinda Balluku, pas një padie të ngritur ndaj saj nga Prokuroria Speciale kundër Korrupsionit (SPAK). Akuzat për Ballukun lidhen me dyshimin për ndërhyrje në një tender për projekte infrastrukturore, akuza që ajo i ka mohuar.
Ky rast ka krijuar një mosmarrëveshje mes SPAK-ut, i cili i ka kërkuar parlamentit të heqë imunitetin e Ballukut për ta mundësuar arrestimin e saj, dhe Ramës. Kryeministri është ankuar për tejkalim të kompetencave nga ana e gjyqësorit, veçanërisht lidhur me masat e paraburgimit.
Shqipëria synon të bëhet anëtare e Bashkimit Evropian deri në vitin 2030. Megjithatë, BE ka theksuar nevojën që vendi të forcojë luftën kundër krimit dhe korrupsionit.
Partia Socialiste e Ramës, e cila vitin e kaluar siguroi mandatin e katërt radhazi, gëzon një shumicë të konsiderueshme parlamentare. Mbetet e paqartë nëse dhe kur kuvendi do të vendosë heqjen e imunitetit të Ballukut, e cila aktualisht mban edhe postin e ministre të Infrastrukturës dhe është një aleate e ngushtë e kryeministrit.
Të hënën, Rama u shpreh para ligjvënësve të partisë së tij: “Momenti kur një ministër shkarkohet, nuk është vetëm një person i shkarkuar, por e gjithë puna e atij institucioni”. Ai njoftoi planin për ndryshimin e ligjit.
Opozita ka organizuar protesta në kryeqytet për të kërkuar dorëheqjen e Ballukut. Të hënën, ata deklaruan se Rama po synon të kontrollojë procedurat gjyqësore në favorin e tij me këto ndryshime.
Partia Demokratike, si forcë kryesore opozitare, në një deklaratë për Reuters ka theksuar: “Kjo nuk është gjë tjetër veçse një përpjekje e Ramës për të mbrojtur veten, duke hedhur në erë si pavarësinë e gjyqësorit ashtu edhe ndarjen e pushteteve… sepse pas Ballukut dhe keqbërjeve të saj qëndron Rama.”