“`html
Euro arrin minimum të ri historik në 96.35 lekë
Kursi i këmbimit Euro-Lek ka vazhduar rënien gjatë kësaj jave, duke shënuar një minimum të ri historik. Sipas kursit zyrtar të Bankës së Shqipërisë, Euro u këmbye sot me 96.35 lekë, niveli më i ulët i regjistruar ndonjëherë.
Agjentët e tregut shpjegojnë se tregu po karakterizohet nga një bollëk valutë dhe kërkesë e dobët për të. Ata vlerësojnë se oferta e Euros gjatë muajve të parë të këtij viti mund të jetë ndikuar pjesërisht edhe nga eksportet e energjisë elektrike nga Korporata Elektroenergjetike Shqiptare (KESH). Për shkak të kushteve të favorshme hidrike, KESH ka kryer shitje të konsiderueshme të energjisë elektrike kohët e fundit, duke realizuar pesë procedura shitjeje vetëm gjatë muajit shkurt.
Rënia e kursit të këmbimit Euro-Lek po theksohet edhe në tremujorin e parë të vitit, një tendencë kjo e pazakontë për vitet e mëparshme. Për këtë arsye, Banka e Shqipërisë po vijon blerjet e valutës për të frenuar forcimin e mëtejshëm të monedhës vendase kundrejt Euros. Pa ndërhyrjet e Bankës së Shqipërisë, kursi i Euros do të kishte rënë në nivele edhe më të ulëta.
Sipas të dhënave zyrtare, për nëntë muajt e parë të vitit 2025, Banka e Shqipërisë ka blerë gjithsej 825.6 milionë euro në tregun e brendshëm valutor, duke shënuar vlerën më të lartë historike për këtë periudhë. Krahasuar me të njëjtën periudhë të një viti më parë, blerjet e valutës janë rritur me 52.2%.
Për vitin aktual, Banka e Shqipërisë synon të rrisë më tej blerjet e planifikuara të valutës, duke synuar blerjen prej 330 – 450 milionë euro përmes ankandeve, me qëllim rritjen e rezervës valutore. Ky objektiv është rritur ndjeshëm nga projeksionet fillestare prej 270-350 milionë euro për vitin 2025.
Megjithatë, Banka e Shqipërisë argumenton se qëllimi i ndërhyrjeve të saj nuk është mbrojtja e një niveli të caktuar kursi këmbimi, por amortizimi i shpejtësisë së lëvizjeve.
Analizat e Bankës së Shqipërisë tregojnë se rënia e kursit të këmbimit të Euros i detyrohet kryesisht rritjes së eksportit të shërbimeve, veçanërisht të turizmit, dhe rritjes së investimeve të huaja, sidomos në pasuri të paluajtshme. Këto zhvillime kanë gjeneruar një tepricë valute në tregun e brendshëm, e cila, së bashku me rritjen e besimit te monedha kombëtare, ka sjellë presione për forcimin e Lekut.
Forcimi i vazhdueshëm i Lekut vlerësohet të ketë favorizuar importin e mallrave dhe shërbimeve nga jashtë dhe, të paktën pjesërisht, ka kontribuar në nivele më të ulëta të inflacionit të importuar. Nga ana tjetër, ky forcim po ndikon negativisht në konkurrueshmërinë e sektorëve eksportues të mallrave dhe shërbimeve, me pasoja serioze veçanërisht në aktivitetet e fasonerisë.
Burimi: Banka e Shqipërisë
“`