Negociatat për paqen: Kievi njofton se raundi i ardhshëm i bisedimeve me Rusinë mund të mbahet këtë javë
Një raund tjetër bisedimesh, me synim përfundimin e luftës në Ukrainë, mund të zhvillohet në fund të kësaj jave, sipas një deklarate të shefit të stafit të Presidentit Volodymyr Zelenskiy dhënë mediave ukrainase të hënën.
Ukraina, Rusia dhe Shtetet e Bashkuara kanë zhvilluar disa raunde bisedimesh në Abu Dhabi dhe Gjenevë, ndërsa Uashingtoni përpiqet t’i japë fund luftës katërvjeçare, e cila ka nisur me pushtimin e Moskës në vitin 2022.
“Mendoj se në fund të javës, këtë javë,” u shpreh Kyrylo Budanov për gazetarët kur u pyet rreth raundit të ardhshëm të bisedimeve. “Nuk është sekret që negociatat nuk janë të lehta, por ne padyshim po ecim përpara dhe po i afrohemi momentit kur të gjitha palët do të duhet të marrin vendime përfundimtare – nëse do ta vazhdojnë këtë luftë apo do të kalojnë në paqe,” citon zyra e presidentit fjalët e tij.
Budanov gjithashtu bëri të ditur se shkëmbimi i radhës i të burgosurve të luftës midis Rusisë dhe Ukrainës mund të ndodhë këtë javë dhe mund të jetë më i madh se ai i mëparshmi, kur secili vend ktheu nga 157 të burgosur lufte. Ai nuk dha një numër specifik.
I pyetur rreth sjelljes së Rusisë në bisedime, Budanov e përshkroi atë si “të përmbajtur, të sjellshme dhe profesionale”. “Ata sillen në një mënyrë krejtësisht diplomatikisht korrekte; është gjithashtu e qartë për të gjithë se ne kemi qëndrime të ndryshme,” u tha ai gazetarëve.
Budanov shtoi se Ukraina po “bënte gjithçka” për të organizuar një takim midis presidentëve të Ukrainës dhe Rusisë, por se aktualisht kjo ishte “shumë e vështirë”.