Qeveria miraton vendimet për rritjen e pagave me 2.5% për mësuesit, policët dhe ushtarakët.
Në mbledhjen e mbajtur sot, Këshilli i Ministrave ka miratuar disa vendime për rritjen e pagave me 2.5% për mësuesit e sistemit parauniversitar, punonjësit e Policisë së Shtetit dhe ushtarakët.
Rritja e pagave do të hyjë në fuqi nga 1 janari 2026, ndërsa shtesa e llogaritur mbi pagën bruto do të aplikohet pas botimit të vendimeve në “Fletoren zyrtare”.
Për sistemin arsimor parauniversitar:
- Përfitojnë rreth 36,390 punonjës mësimorë dhe jomësimorë.
- Për 30,000 punonjës mësimorë, punonjës psikologë/socialë dhe oficerë sigurie në institucionet arsimore, të varësisë së Ministrisë së Arsimit, efektet mujore për paga dhe sigurime llogariten rreth 114.5 milionë lekë.
- Për 1,500 punonjës mësimorë të arsimit profesional, të varësisë së Ministrisë së Ekonomisë dhe Inovacionit, efektet mujore llogariten rreth 6 milionë lekë.
- Për 4,890 punonjës mësimorë të arsimit parashkollor, qendrave kulturore të fëmijëve dhe konvikteve, efektet mujore llogariten rreth 16.7 milionë lekë.
Vendimet e miratuara për rritje të pagave:
1. Disa ndryshime në Vendimin nr. 425, datë 26.6.2024, të Këshillit të Ministrave, “Për miratimin e strukturës dhe të niveleve të pagave të punonjësve mësimorë dhe të punonjësve të tjerë jomësimorë në institucionet arsimore dhe në institucionet plotësuese të sistemit arsimor parauniversitar”.
- Lidhjet nr. 1, 2 dhe 3 të vendimit origjinal zëvendësohen me lidhje të reja.
- Vlerat e elementit “paga e pozicionit” për disa pozicione specifike janë rezultat i indeksimit me 2.5% dhe politikës së rritjes së pagave.
- Për pozicionet e tjera, vlera është rezultat i indeksimit me 2.5%.
- Efektet financiare për vitin 2026 do të përballohen nga buxheti i institucioneve përkatëse dhe nga transfertat e miratuara në ligjin e buxhetit.
- Ngarkohen Ministria e Arsimit, Ministria e Ekonomisë dhe Inovacionit dhe njësitë e vetëqeverisjes vendore për zbatimin.
- Ky vendim hyn në fuqi pas botimit në “Fletoren zyrtare” dhe efektet financiare shtrihen nga 1 janari 2026.
2. Disa ndryshime në Vendimin nr. 4, datë 9.1.2025, të Këshillit të Ministrave, “Për miratimin e vlerave për secilin element përbërës të pagës bruto mujore dhe përcaktimin e kritereve e të procedurave për dhënien e shpërblimeve për punonjësit e Policisë së Shtetit”.
- Lidhjet nr. 1, 2 dhe 3 të vendimit origjinal zëvendësohen me lidhje të reja.
- Vlerat e elementit “paga për gradë” për punonjësit me gradën “Inspektor” dhe “Nënkomisar”, si dhe për gradat e tjera, janë rezultat i indeksimit me 2.5%.
- Efektet financiare për vitin 2026 do të përballohen nga buxheti i Drejtorisë së Përgjithshme të Policisë së Shtetit.
- Ngarkohen Ministria e Punëve të Brendshme dhe Drejtoria e Përgjithshme e Policisë së Shtetit për zbatimin.
- Ky vendim hyn në fuqi pas botimit në “Fletoren zyrtare” dhe efektet shtrihen nga 1 janari 2026.
3. Disa ndryshime në Vendimin nr. 420, datë 26.6.2024, të Këshillit të Ministrave, “Për trajtimin me pagë dhe shtesa mbi pagë të ushtarakëve aktivë të Forcave të Armatosura të Republikës së Shqipërisë”, të ndryshuar.
- Lidhjet nr. 1 dhe 2 të vendimit origjinal zëvendësohen me lidhje të reja.
- Vlerat e elementit “pagë bazë për gradë” dhe “pagë për titull akademik/gradë shkencore/kualifikim shkencor” janë rezultat i indeksimit me 2.5%.
- Efektet financiare për vitin 2026 do të përballohen nga buxheti i Ministrisë së Mbrojtjes.
- Ngarkohet Ministria e Mbrojtjes për zbatimin.
- Ky vendim hyn në fuqi pas botimit në “Fletoren zyrtare” dhe efektet shtrihen nga 1 janari 2026.