Gjermania ndjek ndaj Kinës një politikë të orientuar në fakte, thotë Auron Dodi: Merz në Pekin, dakordësohet me Xi Jinping për forcimin e bashkëpunimit mes dy vendeve
Kancelari gjerman Friedrich Merz zhvilloi një vizitë në Pekin, ku theksoi rëndësinë e partneritetit strategjik dhe nevojën për kanale të hapura komunikimi mes Gjermanisë dhe Kinës.
Duke folur nga Gjermania, analisti Auron Dodi, i cili punon pranë Deutsche Welle, u shpreh se mesazhi kryesor nga vizita e kancelarit Merz në Kinë ishte dakordësimi për forcimin e mëtejshëm të marrëdhënieve dypalëshe. Merz theksoi qartë dëshirën për të forcuar partneritetin strategjik mes dy vendeve.
Gjithashtu, do të rinisin konsultimet ndërqeveritare gjermano-kineze, pas një periudhe të gjatë ndërprerjeje për shkak të pandemisë së koronavirusit dhe ndryshimeve qeverisëse në Berlin.
Gjatë vizitës së kancelarit, Kina njoftoi se do të porosisë 120 avionë të rinj nga kompania Airbus, ku Gjermania dhe Franca janë aksionarë kryesorë. U nënshkruan gjithashtu pesë marrëveshje dypalëshe, duke mbuluar fusha nga mbrojtja e klimës deri te kontrolli i epidemive te kafshët.
Berlini synon të tërheqë më tej investime kineze, por jo në fushën e infrastrukturës kritike, siç janë rrjetet e energjisë, telekomunikacionit dhe portet. Fokus primar i vizitës ishte partneriteti, duke lënë mënjanë rivalitetin, një qasje e theksuar në fillim të mandatit të qeverisë së re gjermane.
Kjo situatë konsiderohet pozitive, duke pasur parasysh se bëhet fjalë për dy nga tre ekonomitë më të mëdha në botë. Kancelari Merz u shpreh se ky bashkëpunim “krijon një vrull të jashtëzakonshëm… si për ne, ashtu edhe më gjerë”.
Sinjalet nga pala kineze
Auron Dodi sqaroi se krerët e shtetit kinez kishin anuluar pushimet e tyre të Festës së Pranverës për të pritur kancelarin gjerman, një gjest që Merz e vlerësoi si një shenjë miqësore të veçantë. Presidenti kinez Xi Jinping vlerësoi se nën udhëheqjen e Merz-it, Gjermania po ndjek një politikë “të orientuar në fakte” ndaj Kinës.
Xi Jinping shprehu dëshirën për të punuar së bashku me kancelarin gjerman për të thelluar më tej partneritetin strategjik mes dy vendeve. Pekini mbështet një bashkëpunim ekonomik më të ngushtë me Berlinin në teknologjitë kyçe, duke vlerësuar strategjitë gjermane në teknologji, inovacion dhe digjitalizim, të cilat përputhen me fokusin kinez në zhvillimin inteligjent, të gjelbër dhe të integruar, sipas Planit të 15-të Pesëvjeçar të Kinës.
Presidenti kinez kërkoi gjithashtu shkëmbim të talenteve, dijes dhe teknologjisë mes dy vendeve.
Diskutimet mbi konkurrencën e drejtë
Lidhur me shqetësimet rreth kompanive kineze që sjellin produkte të lira në tregun evropian, të subvencionuara nga shteti, Kancelari Merz theksoi se konkurrenca e drejtë ishte një temë e rëndësishme në bisedime. Ai theksoi nevojën për transparencë, besueshmëri dhe respektimin e rregullave, si dhe për “kanale të hapura” komunikimi.
Merz ngriti gjithashtu shqetësimet e ekonomisë gjermane për pengesat e shumta tregtare nga Kina. Megjithëse jo në mënyrë të drejtpërdrejtë, u la të kuptohet se situata mund të ketë pasoja, duke marrë parasysh thirrjet për mbrojtjen e ekonomisë gjermane dhe evropiane. Ekonomia gjermane ankohet për kufizime burokratike dhe licenca të përkohshme për eksporte, duke përfshirë metale të rralla, të cilat janë lëndë e parë kritike për teknologjinë e lartë dhe ku Kina ka pothuajse monopol.
Presidenti Xi Jinping mbështeti një ekuilibër të duhur mes konkurrencës dhe bashkëpunimit, duke ofruar sigurinë e zinxhirëve globalë industrialë dhe të furnizimit, një propozim që gjen mbështetje në Gjermani dhe Evropë.
Rreziku i varësisë nga Kina
Delegacioni prej 30 drejtorësh ekzekutivë të kompanive më të mëdha gjermane që shoqëroi Merzin dëshmoi interesin dypalësh për bashkëpunim. Ekonomia gjermane këmbëngul që qeveria të shmangë përshkallëzimin e tensioneve tregtare, pasi kompani gjermane e shohin Kinën si burim lëndësh të para dhe treg kyç për fitime dhe inovacion. Vizita nuk shënoi një hap drejt shkëputjes ekonomike mes dy vendeve.
Bill Anderson, drejtor ekzekutiv i koncernit kimik gjerman Bayer, u shpreh se ideja e shkëputjes ekonomike si strategji gjeopolitike mund të duket e mirë në teori, por në praktikë duhet të kthehemi te realiteti pragmatik. Ai theksoi se zinxhirët globalë të furnizimit janë të nevojshëm për të ofruar produkte me çmime të favorshme.
Deficiti tregtar mes Gjermanisë dhe Kinës
Importet gjermane nga Kina janë rritur, ndërsa eksportet gjermane drejt Kinës po bien, duke rezultuar në një tepricë kineze në bilancin tregtar me Gjermaninë gjatë viteve të fundit. Kancelari Merz theksoi se deficiti tregtar mes Gjermanisë dhe Kinës tejkalon 80 miliardë euro, duke u katërfishuar që nga viti 2020, duke e cilësuar si “një dinamikë ekonomike jo të shëndetshme”.
Ai kërkoi një dialog të hapur për të adresuar këto pabarazi. Ndërsa më parë Gjermania i shmangej këtyre pabarazive falë ekspertizës së saj industriale, tani Kina, duke përfituar nga subvencionet masive shtetërore, po konkurron Gjermaninë edhe në produktet premium të eksportit. Edhe pse kompani si BMW, Mercedes Benz dhe Audi mbeten lidere në tregun global të automjeteve luksoze, shitjet e tyre në Kinë kanë rënë ndjeshëm.
Çështje gjeopolitike të trajtuara në takim
Vizita e Merz në Pekin u zhvillua një javë para udhëtimit të tij drejt Uashingtonit. Ai iu bashkua një grupi liderësh të huaj si britanikë, francezë, spanjollë, australianë dhe koreanojugorë, të cilët gjithashtu vizituan Pekinin me synimin për të përmirësuar marrëdhëniet dypalëshe. Kjo zhvillohet në sfondin e tensioneve në rritje, përfshirë tarifat doganore nga administrata e SHBA.
Sfidat aktuale për Gjermaninë dhe Kinën janë të ngjashme: tensione gjeopolitike, ngadalësim ekonomik në të dy vendet dhe presion tregtar nga SHBA.
Gjatë takimit me kancelarin gjerman, Presidenti Xi Jinping kërkoi që Kina dhe Gjermania të veprojnë së bashku për multilateralizmin dhe mbrojtjen e tregtisë së lirë. Kancelari Merz, nga ana tjetër, theksoi “përgjegjësinë e veçantë” të Kinës dhe u bëri thirrje partnerëve të bisedimeve që të përdorin ndikimin e tyre të jashtëzakonshëm për t’i dhënë fund luftës së Rusisë kundër Ukrainës. Merz theksoi se “sinjalet nga Kina merren seriozisht në Moskë, si fjalët diplomatike ashtu edhe veprimet konkrete”.