## Presidenti i ri i Kosovës: Albulena Haxhiu kërkon dy kandidatë për seancën
Lëvizja Vetëvendosje (LVV), e udhëhequr nga kryeministri Albin Kurti, ka propozuar zëvendëskryeministrin dhe ministrin e Jashtëm, Glauk Konjufca, për president të Kosovës. Ajo i ka ftuar edhe partitë e tjera politike të propozojnë kandidatin e tyre, duke theksuar se deri më tani Konjufca është i vetmi kandidat i propozuar, teksa afati kushtetues për zgjedhjen e presidentit po afrohet.
Kryetarja e Kuvendit të Kosovës, Albulena Haxhiu, ka deklaruar se për të thirrur një seancë për zgjedhjen e presidentit, nevojiten të paktën dy kandidatë. “Derisa nuk kemi së paku dy kandidatë që nuk kanë siguruar 30 nënshkrime për garën për president, unë nuk mund të thërrasë seancën për zgjedhjen e presidentit,” ka thënë Haxhiu. Ajo shtoi se mbeten edhe “30 orë kohë” deri në përfundimin e afatit kushtetues për zgjedhjen e presidentit të ri.
Sipas Kushtetutës, presidenti i ri duhet të zgjidhet 30 ditë para përfundimit të mandatit të presidentit aktual, datë kjo e cila në rrethanat aktuale është 5 marsi, përpara se Vjosa Osmani të mbyllë mandatin e saj më 4 prill. Ehat Miftaraj, nga Instituti i Kosovës për Drejtësi, ka shpjeguar për Radion Evropa e Lirë se edhe nëse Kosova nuk e zgjedh presidentin deri më 5 mars, vendi nuk do të përballet me zgjedhje. Sipas tij, ky do të ishte një shkelje kushtetuese, por pa pasoja juridike siç do të ishte shkuarja në zgjedhje, pasi nuk ekziston një nen kushtetues ku mund të bazohej një dekret për shpërndarjen e Kuvendit.
LVV, duke propozuar Konjufcën, ka shprehur bindjen se në vendin tonë ka shumë emra të denjë për këtë pozitë të rëndësishme shtetërore, rreth të cilëve do të mund të ndërtohej një pajtueshmëri për të ecur përpara. Partia në pushtet ka theksuar se zgjedhjet e reja do të ishin krejtësisht të panevojshme në këtë fazë.
Reagimet nga partitë opozitare kanë qenë të menjëhershme. Lidhja Demokratike të Kosovës (LDK) ka deklaruar se qasja e Lëvizjes Vetëvendosje nuk reflekton një përpjekje serioze për ndërtimin e konsensusit. Sipas LDK-së, për shkak të qasjes “të papërgjegjshme politike të VV-së, vendi po shkon drejt kalimit të afateve kushtetuese dhe rrezikon të dërgohet në edhe një palë zgjedhje të reja”.
Deputetja e Partisë Demokratike të Kosovës (PDK), Vlora Çitaku, ka komentuar se është e qartë se Albin Kurti nuk kërkon zgjidhje, por pushtet total. Ajo ka shkruar në Facebook se, në kohën kur Kosova ka nevojë më shumë se kurrë për maturi, unitet dhe përgjegjësi shtetërore, ai po e shtyn vendin drejt një krize të re politike. Burime brenda PDK-së kanë informuar Radion Evropa e Lirë se deputetët e kësaj partie nuk do të marrin pjesë në seancë “derisa ka kandidatë partiakë pa marrëveshje politike”.
Në media janë përmendur prej ditësh emra të ndryshëm si kandidatë të mundshëm, ndër të cilët sot janë shtuar edhe Glauk Konjufca dhe ministri për Punë, Familje dhe Vlerat e Luftës Çlirimtare, Andin Hoti. Vjosa Osmani më herët kishte shprehur gatishmërinë për të kandiduar edhe për një mandat tjetër. Ajo ishte propozuar nga Vetëvendosje kur u zgjodh për herë të parë në vitin 2021, por jo edhe këtë herë. Kurti, i pyetur nga gazetarët më 2 mars nëse do ta propozojë Osmanin, la të kuptohet se ajo nuk gëzon mbështetje të gjerë, duke theksuar nevojën për të pasur “80 veta që qëndrojnë në sallë dhe votojnë minimalisht”. Ai shtoi se prioriteti absolut është shmangia e zgjedhjeve të reja dhe sigurimi i jo 80, por 84 apo 85 votave.
Gjatë ditës, deputetë të të gjitha partive janë parë pranë Kuvendit, të mbledhur në takime të grupeve parlamentare.
Në Kuvendin me 120 karrige, një kandidat për president duhet të sigurojë dy të tretat e votave, ndërsa kuorumi arrihet me 80 deputetë. Nëse në dy raundet e para një kandidat nuk arrin t’i sigurojë 80 vota, atëherë në votimin e tretë mjafton t’i ketë 61 vota.
Vetëvendosje ka deklaruar se është e gatshme t’ua mundësojë partive opozitare të propozojnë kandidat duke ofruar mbështetjen e nevojshme me 30 nënshkrime. Sipas Kushtetutës, nëse zgjedhja dështon në këto tre raunde, duhet të mbahen zgjedhje të parakohshme parlamentare brenda 45 ditësh.
Zhvillimet e sotme vijnë pas një sërë takimesh të ditëve të fundit mes kryeministrit Kurti dhe liderëve të partive opozitare, si Bedri Hamza i PDK-së dhe Lumir Abdixhiku i LDK-së. Takimet përfunduan pa ndonjë marrëveshje konkrete dhe pa konsensus mes palëve për emrin e kandidatit për president.