Peleshi Viziton Gjermaninë Zyrtarisht, Përjashton Deputetët e PD-së nga Delegacioni
Teksa Gjermania po përballet me vështirësi në bashkimin e forcave demokratike dhe socialiste, deputetë nga të dyja krahët e spektrit politik udhëtojnë këtë javë drejt Berlinit. Një grup do të marrë pjesë në takime zyrtare në Bundestag, ndërsa grupi tjetër do të takohet me partinë simotër të CDU-së.
Sipas burimeve për A2CNN, në delegacionin e Parlamentit, Kryetari Niko Peleshi ka ftuar tre socialistë: Taulant Balla, Erion Malaj dhe Iris Luarasi. Nga opozita, janë përzgjedhur Edmond Haxhinasto nga Partia e Lirisë dhe Redi Muçi nga Lëvizja Bashkë.
Mungesa e përfaqësimit të Partisë Demokratike nga ky delegacion është konfirmuar nga ata vetë, të cilët për A2CNN thanë se nuk janë thirrur nga Kryetari i Kuvendit. Lidhur me këtë, Niko Peleshi ka dhënë një sqarim kur u kontaktua nga A2:
Niko Peleshi, Kryetar i Kuvendit: “Kemi dy deputetë të opozitës. E gjykoj të arsyeshme të përfshij deputetë të ndryshëm nga të gjitha krahët e politikës në delegacionet e vizitave zyrtare.”
Delegacioni i Parlamentit do të zhvillojë takime të enjten me Presidenten e Bundestagut, me grupin e miqësisë Shqipëri–Gjermani, si dhe me kryetarin e Komitetit për Çështjet Evropiane.
Megjithëse nuk u përfshinë në delegacionin zyrtar, tre deputetë të PD-së – Gazment Bardhi, Jorida Tabaku dhe Klevis Balliu, ndodhen në Berlin për takime me përfaqësues të CDU-së. Kreu i grupit demokrat, pas takimit me zëvendëskryetaren e Grupit Parlamentar të CDU-së në Bundestag, përgjegjëse për çështjet europiane, theksoi në rrjetet sociale se Shqipëria ndodhet në një pikë kyçe sa i përket integrimit.
Gazment Bardhi, kryetar i grupit të PD-së: “Lufta kundër korrupsionit mbetet sfidë kryesore që pengon avancimin real të vendit drejt Bashkimit Evropian. Një kulturë politike që shndërrohet në mburojë për korrupsionin jo vetëm dëmton besimin e qytetarëve, por edhe bllokon progresin e Shqipërisë në rrugën e integrimit.”
Shqipëria po kalon një periudhë sfiduese në raport me Brukselin. Disa vende anëtare me ndikim në proceset vendimmarrëse të BE-së, mes tyre raportohet të jetë edhe Gjermania, nuk po japin miratimin për një vlerësim pozitiv të vendit tonë për standardet e ndërmjetme në fushën e shtetit të së drejtës dhe funksionimit të demokracisë, i njohur si IBAR. Sipas burimeve, ky skepticizëm lidhet me zhvillimet e fundit në Shqipëri dhe me vendimin e mazhorancës socialiste për kërkesën e SPAK-ut lidhur me imunitetin e ish-zëvendëskryeministres Balluku.