Tmerr në një pikë karburanti në Itali: 26-vjeçari sulmon gruan me kaçavidë dhe përplas dy persona me makinë
Një ngjarje e rëndë ka tronditur periferinë e Reggio Emilia-s në Itali. Një 26-vjeçar ka sulmuar me kaçavidë një grua teksa ajo po furnizonte automjetin me karburant dhe më pas, duke i përdorur makinën, ka përplasur dy persona që kishin ndërhyrë për të ndihmuar.
Ngjarja ka ndodhur rreth orës 19:00 në një pikë karburanti në Via Martiri di Cervarolo, në zonën e Due Maestà.
Sipas raportimeve paraprake, i riu ndodhej në pikën e karburantit kur, pa një arsye të dukshme, doli nga automjeti i tij dhe sulmoi me kaçavidë një 57-vjeçare nga Scandiano, e cila po furnizonte makinën e saj.
Dy persona që ndodheshin pranë vendit të ngjarjes, një grua 26-vjeçare dhe një burrë 49-vjeçar, tentuan të ndërhynin për ta ndihmuar viktimën e parë. Në atë moment, 26-vjeçari u kthye në automjetin e tij dhe, sipas rindërtimit fillestar të ngjarjes, i përplasi qëllimisht dy personat përpara se të largohej nga vendi.
Forcat e policisë arritën ta identifikonin të dyshuarin dhe e arrestuan rreth një orë më vonë. I arrestuari është një 26-vjeçar i lindur në Reggio Emilia, i cili u mor në paraburgim pas ndërhyrjes së Policisë së Shtetit, Karabinierëve dhe policisë lokale.
Tre personat e plagosur u transportuan në spital me ambulanca. Ata kanë dëmtime të klasifikuara në kodin 3 dhe ndodhen në gjendje të rëndë.
Ndërkohë, autoritetet italiane po hetojnë rrethanat e ngjarjes. Motivi i sulmit mbetet ende i paqartë, ndërsa po vlerësohet edhe gjendja psikologjike e 26-vjeçarit.