CIA: Regjimi iranian i dobësuar, por ende në gjendje të godasë objektiva amerikane
Regjimi iranian, megjithëse dukshëm i dobësuar, mbetet funksional dhe vazhdon të ketë aftësinë për të sulmuar objektiva amerikane. Ky është vlerësimi i bërë nga drejtoresha e Inteligjencës Kombëtare të SHBA-së, Tulsi Gabbard.
Duke folur gjatë seancës vjetore të Komitetit të Inteligjencës në Senatin amerikan mbi kërcënimet globale për SHBA-në, Gabbard theksoi se “regjimi iranian duket ende i qëndrueshëm, por është dobësuar ndjeshëm nga operacioni Epic Fury”, duke iu referuar fushatës ushtarake amerikano-izraelite kundër Teheranit. Ajo shtoi se, pavarësisht goditjeve, Irani dhe aleatët e tij vazhdojnë të kenë kapacitete për të sulmuar interesat e SHBA-së dhe të partnerëve të saj në Lindjen e Mesme.
Gabbard paralajmëroi gjithashtu se, nëse regjimi iranian mbijeton, mund të ndërmarrë një proces disa-vjeçar për rindërtimin e arsenalit të raketave dhe flotës së dronëve.
Seanca dëgjimore pritet të fokusohet kryesisht në luftën në Iran, e cila ka hyrë tashmë në javën e tretë. Ligjvënësit, si republikanë ashtu edhe demokratë, kanë kërkuar më shumë transparencë rreth fushatës ajrore, e cila ka shkaktuar mijëra viktima, ka prekur jetën e miliona njerëzve dhe ka tronditur tregjet globale të energjisë dhe financave.
Demokratët kanë kritikuar administratën e Donald Trump për mungesën e informimit të duhur ndaj Kongresit, duke theksuar se konflikti u ka kushtuar miliarda dollarë taksapaguesve amerikanë. Ata kërkojnë dëshmi publike, në vend të informimeve të klasifikuara që janë zhvilluar gjatë dy javëve të fundit.
Irani nuk ka rifilluar pasurimin bërthamor
Në një deklaratë me shkrim, Gabbard bëri të ditur se Irani nuk ka ndërmarrë përpjekje për të rifilluar aktivitetet e pasurimit bërthamor pas sulmeve të përbashkëta SHBA-Izrael në qershor 2025. Ajo theksoi se pas operacionit Midnight Hammer, programi iranian i pasurimit bërthamor u shkatërrua dhe nuk ka pasur tentativa për rikthimin e kapaciteteve. Sipas saj, hyrjet në objektet nëntokësore të goditura janë mbuluar dhe vulosur me beton. Megjithatë, kjo pjesë nuk u përfshi në dëshminë e saj gojore gjatë seancës, çka ajo e justifikoi me kufizimet kohore, pa vënë në dyshim vlerësimin e bërë.
Ndërkohë, SHBA-të iu bashkuan Izraelit në qershor për të goditur objektiva ushtarake dhe programin bërthamor të Iranit, me presidentin Trump që në atë kohë deklaroi se kapacitetet ishin shkatërruar plotësisht.
Në një zhvillim tjetër, një zyrtar i lartë amerikan në luftën kundër terrorizmit dha dorëheqjen një ditë më parë në shenjë proteste ndaj luftës në Iran, duke argumentuar se Republika Islamike nuk përbënte një kërcënim të menjëhershëm për Shtetet e Bashkuara.