Tragjedi në Bangladesh: Autobusi bie në lumë, humbin jetën të paktën 23 persona, mes tyre gra dhe fëmijë (VIDEO)
Të paktën 23 persona kanë humbur jetën në një distrikt të Bangladeshit të mërkurën, pasi një autobus u fundos në lumin Padma, ndërsa po përpiqej të hipte në një traget transporti.
Sipas agjencive lokale të lajmeve, mes viktimave janë 11 gra, tetë fëmijë dhe katër burra. Autobusi transportonte të paktën 50 pasagjerë dhe u nxor nga uji pas gjashtë orësh me ndihmën e një anijeje shpëtimi dhe një vinçi, për shkak të motit të keq.
Shoferi thuhet se humbi kontrollin e automjetit ndërsa përpiqej të kalonte në tragetin e terminalit Dauladia. Disa pasagjerë arritën të shpëtonin duke notuar drejt bregut, ndërsa të tjerëve iu ofrua ndihmë nga kalimtarët dhe varkat e shpëtimit.
Një video e aksidentit është bërë virale në rrjetet sociale, duke treguar momentin e rënies së autobusit dhe përpjekjet për shpëtimin e njerëzve. Njësitë e shpëtimit, zjarrfikësit dhe rojet bregdetare, me ndihmën e ushtrisë dhe policisë, vijojnë kërkimet për personat e zhdukur.
Autoritetet lokale kanë formuar një komitet hetimor për të zbardhur rrethanat e aksidentit.