Tenderat: Në vitin 2025, rreth 62% e ankesave në KPP lidheshin me vlerësimin e ofertave
Në vitin 2025, ankesat në sistemin e prokurimit publik u përqendruan kryesisht në fazën më kritike të procesit, atë të vlerësimit të ofertave. Kjo situatë ka shtuar presionin mbi transparencën e procedurave.
Raporti vjetor i Komisionit të Prokurimit Publik (KPP) për vitin e kaluar thekson se gjithsej u regjistruan 1,197 ankesa, nga të cilat 99.2% kishin lidhje me procedurat e prokurimit publik. Brenda këtij numri, 748 ankesa, ose 62.5%, ishin të fokusuar në fazën e vlerësimit të ofertave. Gjithashtu, 37% e ankesave lidheshin me dokumentacionin e tenderit, duke sinjalizuar se mosmarrëveshjet shfaqen kryesisht pas hapjes së ofertave.
Në total, Komisioni shqyrtoi 1,152 ankesa gjatë vitit. Në 291 raste u kërkua ndërhyrje e drejtpërdrejtë nga autoritetet kontraktore për korrigjimin e procedurave. Në 37 raste të tjera, u kërkua ndjekje shtesë për zbatimin e vendimeve, pas tejkalimit të afateve ligjore, ndërsa koha mesatare për zbatim ishte 8.8 ditë.
Analiza sipas llojit të kontratës tregon se shumica e ankesave kanë të bëjnë me furnizimin me mallra (56.5% e totalit), e ndjekur nga shërbimet (33.7%) dhe punët publike (9.8%).
Sa i përket vendimmarrjes së KPP:
- 52% e ankesave u pranuan plotësisht.
- 32.6% u rrëzuan.
- Një numër më i vogël çështjesh u mbyllën nëpërmjet ndërhyrjes së vetë autoriteteve ose tërheqjes së ankesave.
Një aspekt i spikatur gjatë vitit të kaluar ishte edhe numri i konsiderueshëm i ankesave për tenderët e teknologjisë së informacionit. Një seri procedurash të zvarritura për muaj të tërë nuk arritën të finalizoheshin, duke rezultuar shpesh në pezullime dhe vendime të KPP që kërkonin autorizim të mëtejshëm.
Një tjetër tregues i rëndësishëm është shpejtësia e trajtimit të ankesave. Koha mesatare e vendimmarrjes është ulur në 10 ditë, nga 12 ditë një vit më parë. Gjithashtu, përqindja e rasteve të shqyrtuara jashtë afatit ka rënë në 8.9%. Analiza sipas kategorive zbulon se procedurat për shërbime trajtohen më shpejt (mesatarisht 7 ditë), krahasuar me 10 ditë për punët publike dhe 12 ditë për mallrat.