“`html
“Partizani” / SPAK nuk kundërshton thirrjen e Ramës për dëshmi
Prokuroria e Posaçme (SPAK) nuk ka kundërshtuar thirrjen e kryeministrit Edi Rama si dëshmitar në procesin penal të quajtur “Partizani”. Në këtë çështje, kryesor për akuzën e korrupsionit të kryer në bashkëpunim, është ish-kreu i qeverisë shqiptare, Sali Berisha.
Kërkesa për thirrjen e Ramës është bërë nga avokatët e të pandehurve. Ata pretendojnë se pikërisht kryeministri ka bërë ndryshimin e destinacionit të klubit sportiv Partizani, çështje për të cilën ai nuk është pyetur kurrë, ndërkohë që nën hetim janë marrë Berisha, dhëndri i tij Malltezi dhe disa persona të tjerë.
Prokurorët kanë deklaruar se në lidhje me këtë çështje, vendimin do ta lënë në vlerësim të gjykatës, duke mos e kundërshtuar thirrjen e kryeministrit si dëshmitar në proces.
Megjithatë, prokurorët kanë këmbëngulur para Gjykatës së Posaçme që të rrëzohen kërkesat e të pandehurve dhe avokatëve të tyre për pavlefshmëri të provave, të cilat në thelb do të rrëzonin procesin. “Kërkojmë që këto pretendime të mos merren parasysh dhe të rrëzohen,” u shprehën prokurorët.
Për marrjen e një vendimi lidhur me kërkesat paraprake të palëve, seanca u shty për datën 15 prill.
Sali Berisha është i pandehur për korrupsion, pasi sipas SPAK-ut, ka favorizuar dhëndrin e tij në privatizimin e klubit sportiv Partizani. Ndërkohë, Jamarbër Malltezi akuzohet për korrupsion dhe pastrim parash, ndërsa disa të pandehur të tjerë akuzohen për vepra të ngjashme.
Ndërkohë, këtë të enjte në Gjykatën e Lartë të Krimeve të Rënda (GJKKO) u zhvillua seanca e radhës për shqyrtimin e kërkesës së paraqitur nga Jamarbër Malltezi dhe bashkëshortja e tij, Argita Malltezi, për heqjen e sekuestros mbi 25 pasuritë e tij.
Gjatë seancës, avokati Klodian Skënderi deklaroi se klienti i tij, për shkak të sekuestrimit të pasurive, nuk ka mundësi të bëjë një jetesë normale. Malltezi shtoi se për këtë arsye nuk ka mundësi të paguajë as avokatët, duke i cenuar kështu të drejtën për një mbrojtje efektive dhe akses në drejtësi. Këto fakte u kundërshtuan nga SPAK.
“`