“`html
Në kërkim për vjedhje dhe shitje lëndësh narkotike, dy persona në pranga në Vlorë
Në Vlorë janë arrestuar dy shtetas të shpallur në kërkim për vepra të ndryshme penale.
Një 25-vjeçar është vënë në pranga pasi dyshohet se gjatë dy muajve të fundit ka vjedhur me forcë bizhuteri floriri, shuma parash dhe celularë nga tre shtetase të huaja.
Ndërkohë, një 34-vjeçar është arrestuar pasi ishte dënuar me mbi 3 vjet burgim për prodhim dhe shitje të narkotikëve.
Shërbimet e Forcës së Posaçme “Shqiponja”, bazuar në informacione të siguruara, organizuan veprime për lokalizimin dhe kapjen e një shtetasi të shpallur në kërkim. Si rezultat, u bë e mundur kapja dhe ndalimi i shtetasit M. A., 25 vjeç, banues në Vlorë.
Ky shtetas dyshohet se më datë 08.02.2026, në Lungomare, ka vjedhur me forcë nga dy shtetase kazake: 1 celular, 1 byzylyk floriri dhe 2700 euro. Gjithashtu, më datë 04.03.2026, në lagjen “10 Korriku”, i ka vjedhur me forcë një shtetaseje kazake, varësen e floririt, celularin dhe 4000 dollarë.
Specialistët e Stacionit të Policisë Selenicë, në vijim të punës për kapjen e personave të shpallur në kërkim, bënë të mundur arrestimin e shtetasit K. D., 34 vjeç, banues në Vlorë. Ky shtetas ishte shpallur në kërkim pasi Gjykata e Vlorës e ka dënuar me 3 vjet, 3 muaj e 28 ditë burgim, për veprën penale “Prodhimi dhe shitja e narkotikëve”, kryer në bashkëpunim.
Materialet procedurale i janë referuar Prokurorisë së Vlorës për veprime të mëtejshme.
“`