BE e tmerruar nga lufta në Iran: Mund të arrijmë te nafta me racion
Bashkimi Europian po vlerëson të gjitha mundësitë për t’u përballur me tronditjen afatgjatë energjetike të shkaktuar nga lufta në Lindjen e Mesme. Kështu deklaroi Komisioneri i energjisë i Bashkimit Europian, Dan Jorgensen.
Në një intervistë për Financial Times, Jorgensen u shpreh se mes mundësive që po shqyrtohen janë racionimi i karburantit dhe lirimi i sa më shumë naftës nga rezervat e emergjencës.
“Kjo do të jetë një krizë e gjatë. Çmimet e energjisë do të jenë më të larta për një kohë shumë të gjatë dhe vendet duhet të sigurohen që të kenë atë që u nevojitet”, theksoi Dan Jorgensen, komisioner europian për energjinë.
Situata ka detyruar qeveritë të hartojnë plane për të mbështetur konsumatorët dhe ka nxitur disa vende të ndezin termocentralet me qymyr.
I pyetur në lidhje me mundësinë e ndryshimit të rregullores europiane për një nga sektorët më të prekur, karburantin e avionëve, i cili kërkon kushte specifike për t’u ruajtur, komisioneri tha se çdo opsion mbetet i hapur.
“Po shqyrtojmë të gjitha mundësitë dhe është e qartë se sa më serioze bëhet situata, aq më shumë sigurisht që do të duhet të shqyrtojmë edhe mjetet legjislative”, shtoi komisioneri.
Jorgensen nuk përjashtoi një tjetër lirim të rezervave strategjike të energjisë nëse situata bëhet më e rëndë. Vendet e BE-së morën pjesë në lirimin më të madh të rezervave të naftës në histori muajin e kaluar, në një përpjekje për të zbutur çmimet në rritje.
Aktualisht, nafta e papërpunuar Brent shitet me rreth 110 dollarë për fuçi.