Aldeguer firmos për Ronaldon, CR7 “peshkon” talentin e motorëve
Jo të gjithë e dinë që Kristiano Ronaldo, përveçse një futbollist i shquar, zotëron edhe një sërë biznesesh me sukses të konsiderueshëm. Mes tyre përmenden investimet në pasuri të paluajtshme, palestrat dhe klinikat për trajtimin e rënies së flokëve. Megjithatë, sulmuesi portugez ka edhe një kompani tjetër që po fiton gjithnjë e më shumë rëndësi mes sportistëve: AVA (Advanced Recovery for Athletes – Rikuperim i Avancuar për Sportistët).
Kjo kompani ndihmon sportistë nga e gjithë bota të parandalojnë dëmtimet, të përshpejtojnë rehabilitimin në rast lëndimesh dhe të zgjasin e përmirësojnë karrierën e tyre sportive. Një shembull domethënës është vetë Ronaldo, i cili pritet të marrë pjesë në Kupën e tij të gjashtë të Botës në Shtetet e Bashkuara të Amerikës gjatë verës, në moshën 41-vjeçare.
Kompania e “yllit” portugez, e cila është themeluar vetëm një vit më parë, përfshin klube të shumta nga liga portugeze dhe ajo saudite, si dhe sportistë nga disiplina të ndryshme, siç janë boksi, padeli, tenisi apo hendbolli. Nga bota e motorsportit, deri vonë, ishte i pranishëm vetëm një emër: Antonio Felix da Costa, dy herë kampion i Formula E dhe fitues i fundit i “E-Prix në Madrid”, në moshën 34-vjeçare.
AFRIMI ME TALENTIN E MOTOGP
Së fundmi, sulmuesi portugez ka shprehur interes për Fermin Aldeguer, një adhurues i deklaruar i Real Madridit dhe i CR7. Aldeguer po rikuperohej nga një frakturë në femurin e majtë, pas një rrëzimi në cirkuitin e Malajzisë më 8 janar. Interesi i Ronaldos ishte aq i madh saqë piloti spanjoll përfundoi duke u bërë ambasador ekskluziv i “AVA” në MotoGP.
Në këtë mënyrë, talenti i ri në MotoGP do të përfitojë nga të gjitha shërbimet që ofron kjo kompani për t’u rikthyer në formën më të mirë për garën e ardhshme në Jerez dhe pjesën e mbetur të kampionatit botëror. Fituesi i Çmimit të Madh të Indonezisë 2025 nuk hezitoi aspak kur mori ofertën nga portugezi, duke finalizuar menjëherë marrëveshjen.